Sonsona nakabawus
CEBU, Philippines - Gipamatuod ni Filipino boxer Marvin ‘Marvelous’ Sonsona (19-1, 15KOs) nga aduna pa siya'y paglaum nga mokampiyon pagbalik human niya panimasli si Puerto Rican Wilfredo ‘Papito’ Vazquez Jr. kagahapon didto sa Madison Square Garden sa New York.
Sa maong kadaugan, si Sonsona miangkon sa North America Boxing Federation featherweight title, apan mas mahinungdanon alang ni Sonsona ang panimawos ngadto ni Vazquez kinsa mipilde kaniya pinaagi sa knockout upat ka tuig na ang milabay.
Gipakita ni Sonsona nga seryoso siya sa iyang laraw nga panimawos human niya gipatumba si Vazquez sa first round, apan daling nakarekober ang Puerto Rican aron humanon ang away.
Miaksyon pagbawos si Vazquez sa fifth ug sixth round dihang mipatugpa siya og mga kombinasyon ngadto sa ulo ni Sonsona.
Nahimong ngil-ad ang away dihang nalambigit sa wrestling ug mga accidental head butts ang duha ka boksidor. Nakuhaan usab og uno punto si Sonsona sa sixth round human sa illegal punch sa luyo sa ulo ni Vazquez.
Hinuon bisan pa niini, si Sonsona padayun nga mikolekta og puntos hangtud sa hinapos nga bahin sa away gamit iyang pabor sa gitas-on.
Human sa 10 ka rounds nga binukbukay, duha ka hurado ang mihatag og 96-92 ngadto ni Sonsona, samtang usa ang mipabor ngadto ni Vazquez 96-92.
Sa maong kadaugan si Sonsona muduol sa damgo niya nga subling moaway alang sa world championship human siya nahimong WBO super flyweight king niadtong tuig 2009. (BANAT PALARO)
- Latest
