Ex-ALA boxer milayat sa MMA
CEBU, Philippines - Kanhi ALA Boxing Gym fighter nga si Joseph 'Jomanz Omanz' Omaña, mohimo sa iyang unang away sa Mixed Martial Arts (MMA) batok ni Thai kickboxer Dejdamrong Sor Amnuavsirichoke sa ONE Fighting Championship fight card karong Hunyo 14 didto sa Jakarta, Indonesia.
"Daku gyud ni nga chance nako nga ipakita akong abilidad ug makahatag og pride sa Cebu," matud pa ni Omaña.
Sa boksidor pa siya, si Omaña adunay rekord nga 12-2, 6KOs, apan naputol ang iyang karera tungod sa iyang sakit sa panit.
Gikan sa iyang pagretiro sa boksing, si Omaña nahimong trainer sa Legacy Gym sa Boracay diin nakahukom siya nga moapil sa usa ka amateur MMA tournament diin nagbitbit siya og 1-1 nga baraha.
Gawas ni Omaña, laing duha ka Filipino MMA fighters nga silang Gege Eustaquio ug wushu fighter Ruel Catalan ang moaway sab sa maong fight card. Harungon ni Eustaquio si Kentaro Watanabe sa Japan, samtang si Catalan makigsangka ni Gianni Subba sa Malaysia.
Sa laing bahin, ang Cebuano nga si Vaughn Donayre sa Yaw-Yan ArDigma mipirma na usab og kontrata sa ONE FC diin moaway siya sa maong torneyo sa hinapos nga bahin ning tuiga. (BANAT PALARO)
- Latest
