Riverside, Crossing miratsada dayon sa Leking Cup

CEBU, Philippines -  Mikulit og daog ang Riverside ug Crossing sa inter-sitio friendship games sa Kapitan Leking Cup Basketball Tournament didto sa Poblacion Oriental open court sa  Consolacion, Cebu.

 Si Baste Alivio misansan og 20 puntos, samtang sila si Pongpong Seno ug Emsyo Mendoza nagkumboya'g 25 puntos alang sa Sitio Riverside nga milubong sa Villacon, 80-69.  Samtang si Chanchan Gerundio mipabuto'g 29 puntos aron luwason ang  Crossing batok sa Eryangs, 89-86.
 Si Gerundio nakakuha sab og suporta gikan nilang Jundy Gerundio ug  Chucky  Sanchez sa ilang 16 ug 14 puntos matag usa.
 Ang managsuong Louie ug Lemuel Malagar nagkumboya'g 62 puntos alang sa naparot nga Eryangs, samtang si Pippo Flores mipupo og 30 puntos sa napildeng Villacon.
 Sa laing duwa, ang Sitio Sapasapa nagsalig sa ilang mainitong rally aron mapukan ang Semblante's  Compound, 57-49.
 Si Mark Yongco mao lang ang bugtong miiskor og double figure alang sa Sapasapa sa iyang 10 puntos, samtang si Johnny Semblante milansang og 11 puntos alang sa Semblante's Compound.
 Gawas sa inter-sitio friendly games, ang lain  pang mga kategoriya nga naglatid sa usa ka bulan nga kompetisyon mao ang mini (15 years old and under), midget (20-under ug juniors (21-above).
 Pito ka sitios ang misalmot sa maong kalihukan nga  gisuportahan sa tibuok barangay council sa Poblacion Oriental ubos sa liderato ni Brgy. Capt. Melquiades  'Leking'  Caylan.
 Moduwa sila og double round robin elimination diin ang top four moabante sa crossover semifinals. Ang mga mananaog maoy magsangka sa kampiyonato.
 Ang mga duwa gidumala ni sports chairman Paul  Alelu Q. Flores, kanhi magduduwa sa Far Eastern University (FEU) Tamaraws sa UAAP ug league commissioner Jerome S. Valle.
 Giabagan sila ni Jocelyn Valle, Vic Lagahit ug Baby Jonhaniel Abinales. (BANAT NEWS)