Angay silotan

CEBU, Philippines -  Mipasalig ang mga kadagkuan sa Cebu  Football  Association (CFA) nga  ilang silotan ang tanan nga nalambigit sa  kagubot sa duwa tali sa  Sacred Heart  School-Ateneo de Cebu (SHS-AdC) ug Alcoy Football Club sa boys under-18 class sa 16th Aboitiz Football Cup niadtong  Domingo.

 Ang maong salawayon nga insidente nakahatag og dili maayong imahe dili lang sa local football scene, apan sa kinatibuk-an sports community sa Sugbu.

 "It is most unfortunate that it happened in this beautiful game of football, but it's something that is beyond our control,"  matud pa ni lawyer Julius Entice, sakop sa CFA disciplinary committee sa press conference kagahapon didto sa CFA office.

 Matud pa ni Entice, ang CFA nihimo'g sunod-sunod nga tigum human sa maong insidente aron makab-ot ug matugkad ang komprehensibong balita kalabot sa maong hitabo.

 Basi sa pamahayag sa mga  nakasaksi nga ilang gipatawag, si Entice miingon nga ang insidente nagsugod dihang pisikal na ang duwa ug gumikan niini, pipila ka fouls ang gitawag, yellow cards ang gipahamtang ug ang mga reperi mihatag og "warnings" ngadto sa mga players sa duha ka kampo aron maputol ang tensiyon.

 Si Mon Ferdinand Osorio sa Alcoy FC gitawgan og foul batok ni Thirdy Pepito sa SHS-AdC, kinsa mihimo'g "provocative gesture" apan walay kontak nga nahimo. Dihang ang reperi miuwang aron paglikay sa lalis, si Osorio giingon nga misukmag sa player sa Ateneo.

 Didto nahitabo ang lamok-lamok ug ning puntoha, usa ka tawo gikan sa bench sa Alcoy FC nga nagsul-ob og green t-shirt ug itom nga short pants misulod sa field ug nakadapat  og upat ka mga  players sa SHS-AdC. Gumikan kay nahitabo  duol sa ilang bench, ang pipila ka Ateneo players ang miapil sa lamok-lamok. Misulod sab sa playing field ang ubang mga tawo, apan dili mag-apil-apil sa kagubot kun dili pagpakalma sa sitwasyon.

 Ang coach sa Alcoy FC nga si Chris Niño de los Santos  nakaila sa  tawo, kinsa   nagduslit sa kagubot, apan  gipugngan ang pangan sa The Freeman, ang igsuong mantalaan sa Banat News  gumikan kay menor de edad pa kini (BANAT NEWS)