Nabihag

CEBU, Philippines -  Nabihag ang labing menos upat ka lig-on nga teams sa NBA ug lakip niini ang defending champion Miami Heat ug Oklahoma City Thunder sa ilang duwa kagahapon sa  managlahing binyu.

  Ang Heat gisungag sa Chicago Bulls sa iskor nga 88-95 didto sa United Center sa Chicago, Illinois ug  ang Thunder napilde sa Los  Angeles Lakers, 110-114 didto sa Staples Center sa Los Angeles, California.

 Laing nabiktima  mao ang Indiana Pacers, kinsa nahiagum sa labing taas nilang losing streak nga upat ka duwa, miyukbo sa  Dallas Mavericks, 94-105, samtang midaog sab ang Houston Rockets batok sa Portland TrailBlazers pinaagi sa overtime sa iskor nga  118-113.

 Didto sa United Center, depensa maoy gihimong lig-ong hinagiban  sa kadaugan sa Bulls batok sa Heat, kinsa nakatagamtan sa ilang ikatulong sunod-sunod nga pilde.

 Si Joakim Noah midaro og 20 puntos uban sa iyang 12 ka rebounds alang sa Bulls, apan si D.J. Augustin maoy nangulo sa kadaugan nga miungad og 22 puntos.

 Aduna untay higayon nga modaog ang Heat,  apan natapalan ni Jimmy Butler ang itsa ni  LeBron James aron ihatod ang duwa ngadto sa overtime.

 Gipabayad sa Bulls ang Heat kinsa kanunay mobaraw kanila sa miaging duha ka seasons.

 Dihang himsog ug wala pay piang si Derrick Rose niadtong 2011 diin ang Bulls maoy No. 1 team, gipilde ang Chicago sa Miami sa Eastern Conference finals. Sa miaging tuig dihang wala si Rose tungod sa piang, gitagak sab sa Heat ang Bulls sa second round sa playoffs nga maoy naggiya kanila ngadto sa ilang ikaduhang sagunson nga luna ngadto sa NBA Finals.

 Si Dwyane Wade maoy nangu sa Miami sa iyang 25 puntos, apan naglisud gihapon si James ug igo lang mihimo’g 17 puntos sa iyang 8-of-23 shooting.

 Didto sa Staples Center, si Jodie Meeks mikulit og career-high 42 puntos aron pangulohan ang Lakers sa ilang pagpilde sa Thunder, ang lider  sa Western Conference.

 Si Pau Gasol mihakot og 20 puntos uban sa iyang 11 ka rebounds alang sa Lakers nga  adunay 22-42 win-loss record.

 Si Meeks maoy ikatulong player sa  Lakers nga mihimo’g labing menos 30 puntos karon nga season.

 Ang star sa Thunder nga si Kevin Durant  mihimo'g triple-double pinaagi sa iyang 27 puntos,  10 ka rebounds ug 12 ka assists aron pangulohan ang koponan. Mao kadto ang ikatulong triple-double ni Durant  karon nga season.

 Midugang og 21 puntos si Serge Ibaka uban sa iyang 15 ka rebounds.

 Sa laing duwa,   ang New Orleans Pelicans mitusik   sa Denver Nuggets, 111-107 pinaagi sa overtime,  midaog sab ang Boston Celtics  batok sa Detroit Pistons, 118-111.  Ang Brooklyn Nets milubong sa  Sacramento Kings, 104-89,  gitumba sa Toronto Raptors ang Minnesota Timberwolves, 111-104 ug   ang Golden State Warriors midaog  sa Phoenix Suns, 113-107.

(GGM gikan sa wires)