Mayor Rama mikadlit og 58 puntos

CEBU, Philippines - Nagpauwan og 16 ka three-pointers si Mayor Mike Rama dugang pa gyud sa iyang lima ka dug-ol nga jumpshots aron pangulohan ang Team Rama (Mayor's Office) ngadto sa 123-91 nga paglampurnas sa City Traffic Operations Management (CITOM) sa nagpadayon nga Cebu City Hall Inter-Department basketball tournament nga didto ipahigayon sa San Nicolas gym, ning dakbayan.

Miposa og 58 puntos si Mayor Rama---48 puntos niini gikan sa iyang 16 ka triples ug laing 10 puntos sa mga dug-ol nga jumpshot aron baswaton ang iyang team nga segurado nang moabante sa semifinals isip top seed. Ang torneyo gisalmotan sa 23 ka teams.

Tataw kaayontg nagpa-init lang sa iyang mga kamot si Mayor Rama  tungod kay igo lang siyang mihimo'g usa ka tres sa first period ug laing duha ka tres sa second period apan didto sa third quarter, miposa og walo ka tres si Mayor Rama ug midugang pa gyud siya'g lima ka triples sa fourth quarter.

Laing duha ka teammates ni Mayor Rama mibahug sab og double figures ug aduna na sila karo'y 5-0 nga baraha.

 Unom ka players sa CITOM ang mihakot ug double figures apan ang ilang kinatibuk-an 78 puntos diriyot hi-apsi ni Mayor Rama.

Ang Team Rama gipalig-onan sab nilang ex-UV Lancer Rene Toring ug ex-USJR Jaguar Argiel Magan. Ang coach sa Team Rama mao si Charlie Reyes.

Puntos matag usa:

Team Rama (123) –    M. Rama 58, Aniñon 16, Abellana 14, Batid 8, Otarra 8, Toring 7, Magan 6. Bacullo 3.

CITOM (91)–             Ordez 19, Igoy 16, Ybañez 12, Mordeno 11, Codi 10, Borbon 10, Ordez 8, Celina 4. (BANAT PALARO)