Happy new year 2014

Human sa 12 ka buwan kon 365 ka adlaw (366 leap year), ato nang paklion ang kataposang panid sa kalendaryo kay ato na man sugaton ang bag-ong tuig 2014.  Kung sa Tagalog pa "dalawang tulog na lang" New Year na.

Hapit na molabay ang tuig 2013 ug nunot niining iyang pagtapos, hingpit na sab natong talikdan ang duha ka kalamidad nga nakapausab sa dagan sa atong kinabuhi ug wa kita'y katarungan nganong lingoon pa nato ang masakit nga kasinatian. Hinoon, atong paningkamotan og maayo kung unsay atong mahimo sa tuig 2014. Ayaw na mo nianang mga "new year's resolution" nga walay katumanan kay basin maparehas mo ni Pinocchio nga matag higayon nga siya mamakak, mag-anam og kataas ang iyang ilong. Mao tingali kini ampay sa uban aron di na magkinahanglan pa og "nose lift."

Dunay mga tawo nga nindot kaayong paminawon ang ilang new year's resolution  kay dili na kuno sila moinom, mohunong na sa pagpanigarilyo (labi pa gyud ang droga), biyaan ang sugal (hantak, mah-jong ug sabung ) apan ang lintunganay ra gyud diay sa mga yabag og utok nga usa lang kuno ka butang ang dili nila biyaan ug kini mao ang "pagpamakak." Na hala! Ginoo na lay mag-igo ninyo kung asa ka niya ibutang.

Dinhi sa Sportsgab, nagpili kita og pipila ka mga panghitabo sa sports sa 2013 nga lisod natong hikalimtan ug segurado ako nga sa mga year-ender sa sports pages sa mga lokal nga pamantalaan, ila sab kining hisgotan.

Akong ipaambit kaninyo ang nahitabo sa Cebu Schools Athletic Foundation, Inc. (CESAFI) best-of-five championship series tali sa University of the Visayas (UV) Green Lancers batok sa ilang higpit nga karibal ang Southwestern University (SWU) Cobras didto sa Cebu Coliseum. 

Nakauna ang Cobras sa finals sa ilang 2-0 record ug usa na lang unta ka daog, mahimo unta silang ikatulong team sa CESAFI nga mokulit og back-to-back title.

Midaug sa Game 1 ang Cobras, 64-52 (Sept. 24) ug nasundan og laing daog sa Game 2 sa iskor, 71-60 (Sept. 26) ug nianang Sept. 29 sa Game 3, nanimaho na unta ang victory party sa Cobras ug nagpanikad na ang mga players aron mohabhab og pochero ug mosuyop sa mabugnaw nga beer apan sama sa usa ka milagro, nabuhi ang nag-pinal na unta nga Lancers dihang midaug sila pinaagi sa double overtime, 89-82 ug nalangay ang gilaraw untang victory party sa Cobras niadtong Septiyembre 29 apan labaw gihapon ang Cobras, 1-2.

 Game 4 (Oct.) ug laing higayon nga makuha sa Cobras ang kampiyonato apan naka-eskapo na sab ang Lancers sa ilang 71-66 nga kadaugan ug nakapugos og Game 5 sa ilang 2-2 nga baraha.

 Sa Game 5, giingon nga "anybody's ballgame ug mahimong Cobras ang modaug o pwede sab ang Lancers. Nawagtang sa Cobras ang ilang bentaha ug didto na mobalitok sa Lancers kinsa mipatinuod sa salida ni James Bond nga "You Only Live Twice" kay wala lang sila mabuhi makausa o sa duha ka higayon, sila pa gyud maoy nahimong champion ug usa kadto ka records sa kasaysayan sa CESAFI nga dunay tem nga biya og 0-2 pan midaug og sagunson tulo ka duwa aron modaug sa korona nga maoy ilang ika-10 nga titulo.

Usa kadto sa labing maanindot nga Game 5 sa CESAFI Finals ug midaug ang Lancers sa iskor, 64-62 (Oct. 3) pinaagi sa winning basket ni Hernal "Wowie" Escosio aron mohimo'g "sweep in reverse" ug midaug pinaagi sa 3-2.

Ang 2013 swerte nga tuig sa Lancers apan dili sa mga teams sa high school kay mao sab kadto'y unang hitabo sa kasaysayan sa CESAFI  nga nagubot pinaagi sa "temporary restraining order" nga giluwatan sa korte apan wala respetohi sa CESAFI hinungdan nga walay finals sa high school division.

Ang hinungdan mao nga midangop sa korte ang University of San Carlos Baby Warriors nga makaduwa si Scott Aying apan nagdumili ang CESAFI tungod kay dili siya eligible. Human maporma ang Top Four---SHS-Adc, CEC, USC ug UV, mihukom ang CESAFI nga undangon na ang mga duwa sa juniors division.

Atong paaboton kung unsay mahitabo sa CESAFI 2014.

MISCELLANEOUS. I hosted the first-ever Family Reunion without our deceased mother Flordelina Malagar in our residence last December 25. To those who remembered me by giving Christmas gifts, thank you very very much including USC Baby Warriors coach Britt Carlo Reroma who gave me another San Beda t-shirt collections.