Tabal modagan sa Cebu City Marathon

CEBU, Philippines -  Ang  bag-ong rayna sa National Milo Marathon nga si Mary Joy Tabal modagan sa Cebu City Marathon sa Enero 12 sunod tuig nga magsugod ug matapos sa I.T. Park sa Brgy. Apas, ning siyudad.

 Hinuon, si Tabal adto ra  modagan sa 21K half-marathon kay dili niya makaya ang pagdagan og full marathon nga mubo lang ang sal-ang sa panahon.

 Si Tabal nanghawod sa National Milo Marathon niadtong  Disyembre 8 usa ka bulan kapin  sa dili pa ang Cebu City Marathon 2014.

 Gawas sa pagrekober, unang tumong ni Tabal mao ang paghatag og dungog sa nasud sa Paris Marathon.

 Sumala pa ni  Tabal, nga ang pagdagan sa 42K category sa Cebu City Marathon dakung risgo sa iyang kampanya sa Paris Marathon nga gikatakda sa Abril sunod tuig.

 Sa pagdagan ni Tabal ubos sa 21K, ang kompetisyon sa women's 42K mahimong duwa sa tanan.

 Ang kanhi running queen  nga si Mary Grace delos Santos gilauman nga mangulo sa mga kontender alang sa women's 42K crown.

 Ang 2014 edition sa Cebu City Marathon gibahin sa duha ka dibisyon -- open ug all-Filipino division.

 Mokabat  sa  P640,000 nga   ganting  salapi  ang giandam alang sa top performers sa Cebu City Marathon  nga  magsilbe sab nga      qualifying     race     alang sa     mga   dagkung   international marathons nga ubos sa bendisyon sa Association of International Marathons and Distance Races. (BANAT PALARO)