Bird nagpa-interview na sa media

MANILA, Philippines - Kung noong Lunes at Martes ay hindi nagpaunlak ng anumang panayam o pumirma ng autograph si Larry Bird, kahapon ay pinagbigyan niya ang media sa loob ng 15 minuto.

Binanggit ni Bird, nagbigay ng tatlong NBA championship para sa Boston Celtics kasama sina Kevin McHale at center Robert Parish para sa orihinal na ‘Big Three’, ang karanasan niya bilang miyembro ng ‘Dream Team’ na nagdo­mina sa 1992 Olympic Ga­mes sa Barcelona, Spain.

“They tried to duplicate that team all through these years but that’s a special team with special players. A lot of talent. It’s a great  honor to be part of that team,”  wika ng 54-anyos na si Bird.

Nakasama ni Bird sa ‘Dream Team’ sina Michael Jordan, Magic Johnson, Karl Malone, Charles Barkley, John Stockton at iba pa.

Nasa bansa si Bird para sa NBA Global Games 2013 kung saan maglalaban ang Indiana Pacers at ang Houston Rockets sa isang pre-season match ngayong alas-7 ng gabi sa Mall of Asia Arena sa Pasay City.

Kumpiyansa naman si Bird, ang president for bas­ketball operations ng Indiana Pacers, sa kanilang magiging kampanya para sa darating na NBA season.

Ngunit ang ikinatuwa ng media ay nang mabanggit ng isang lady reporter ang salitang ‘pressure’ kay Bird.

Pressure? I don’t know what that is. Obviously, you’ve never seen me play,” biro ng 6-foot-9 na si Bird.

Bago ito ay pinagbigyan ni Bird ang kahilingan ng isang bata para sa kanyang autograph.