USC midaog ikaduhang sunod-sunod nga SBP title

CEBU, Philippines -  Gipabuhagay sa University of San Carlos (USC) ang tibuok nilang kusog aron dominahon ang tibuok duwa batok sa University of the Visayas (UV), 70-25 ug ingon man aron usab langkaton ang titulo sa Small Basketeers Philippines division sa BEST SBP Passerelle Twin Tournament nga gipaluyohan sa Milo  didto  sa USC North Gym sa miaging weekend.

 Siyete puntos lang ang labaw sa USC paghuman sa first period, 17-10, apan ang defending champions mipauwan og mga puntos aron inaton ang labaw, 40-14 sa halftime pinaagi sa nuybe puntos gikan ni Joseph Berdin, samtang ang UV  gipugngan ngadto lang sa kuwatro puntos sa second quarter.

  Dali kaayong miburot ang labaw sa USC sa third quarter diin miposte sila'g 60-19 nga abante pinaagi sa tandem nilang Juan Climaco ug Mikhael Rusiana nga nagkumboya'g 12 puntos.

 Ang USC, kinsa maoy defending Cebu ug Visayas champions yano kaayong naglawig ngadto sa kampiyonato pagsugod pa lang sa fourth quarter. Ang ilang depensa  nakatampo sab og daku sa ilang kadaugan.

 Si ZJ Enriquez, ang maoy napiling Most Valuable Player of the tournament, maoy nangu sa USC sa iyang 13 puntos, samtang si Joshua Betinol midugang og 10 puntos.

 Tungod sa maong kadaugan, ang USC maoy morepresentar sa Sugbu sa ikaduhang sunod-sunod nga tuig sa Visayas Regional finals diin sila ang defending Visayas regional champions. Ang regional finals adto himuon sa Iloilo unya sa Oktubre 13-14.

 Mao na sab kini ang ikaduhang major title sa USC karon nga school year human sila modaog og gold medal sa elementary basketball sa bag-o lang natapos nga 18th Milo Little Olympics Visayas Regional Finals   sa miaging semana.

 Sa sayo pa, ang Sacred Heart School-Ateneo de Cebu (SHS-AdC) midaog batok sa Don Bosco Technology Center (DBTC), 42-39 aron sakmiton ang ikatulong puwesto.

 Sa mga duwa ubos sa Passerelle division, ang UV (6-0) mao ang miangkon sa korona human sa ilang 39-30 nga kadaugan batok sa SHS-AdC. (BANAT NEWS)