CEC, USC midaog sa SBP opener

 CEBU, Philippines -

 Nagkinahanglan una’g  overtime ang CEC aron modaog batok sa University of the Visayas (UV) sa iskor nga 58-54, samtang ang defending champion USC milubong buhi sa Don Bosco Technology Center  (DBTC),  61-30 sa Small Basketeers Philippines division.

 Daan nang naglabaw ang CEC paghuman sa third quarter sa iskor nga  35-26,  apan  ang UV mihimo’g 9-0 run aron tablahon ang iskor, 35-all.

 Nakuha’g balik sa CEC ang labaw, 44-40 sa nahibiling dos minutos ug gitubag kini ni Brice Ngujo pinaagi sa iyang duha ka free throws aron mosikit, 42-44 sa wala pa moiskor og running jumper si JZ Dizon sa katapusang 7.4 segundos aron ihatod ang duwa ngadto sa overtime human magtabla ang iskor,  44-all human sa regulation period.

 Sa dugang singko minutos, ang  CEC mao nay nagkontrolar sa duwa  diin nakabaton kini og otso puntos nga  bentaha, 52-45 sa nahabiling 2:46 sa overtime.

 Ang sagunsong kuwatro puntos ni Karl Tiu maoy nagselyado sa kadaugan sa CEC.

 Si Ryan Tecson maoy  topscorer sa CEC pinaagi sa iyang 18 puntos lakip na ang otso puntos niini  sa

overtime, samtang si Dizon mao usab ang nangu sa UV sa iyang 17 puntos.

 Sa laing bahin,  si  Vince Razo nga miiskor og 14 puntos sa first period maoy nangu sa  USC sa iyang 16

puntos ning maong torneyo nga  gipaluyohan sab sa RCBC Savings Bank. (BANAT PALARO)