Estrada kompiyansa batok Melindo
CEBU, Philippines - Taas ang kompiyansa ni Mexican boxing champion Juan Francisco ‘El Gallo’ Estrada nga (24-2, 18KOs) nga dili mailog ni undefeated Filipino challenger Milan ‘El Metodico’ Melindo (29-0, 12KOs) ang iyang bakus atol sa ilang sangka karong Sabado.
Si Estrada modepensa sa iyang WBO/WBA flyweight title batok Melindo sa main event sa Top Rank Inc. event didto sa Cotai Arena sa Venetian Resort Hotel and Casino sa Macau.
Sama ni Melindo, miabot na usab si Estrada didto sa Macau ug mipadayag kini sa iyang dakung salig nga mugawas nga mananaug atol sa sangka nila sa Pinoy boxer.
Ang 23-anyos nga si Estrada miangkon sa WBO ug WBA title human niya gikulata ang kanhi Fil-American champion nga si Brian Viloria Abril 6 sa susamang venue.
Si Estrada nagkanayon nga daku ang garbo nga iyang nahatag sa Mexico human sa maong kadaugan og desidido siya nga pun-an pa kini pinaagi sa pag-uli sa iyang nasud nga dala gihapon ang bakus.
“I am motivated for my defense, had a good preparation and will prove it in the ring. We will bring the belts back to Mexico. I share these with my team and all my people in Mexico who support me,†matud pa ni Estrada sa boxingscene.com.
Sa iyang bahin, si Top Rank Inc. bigboss Bob Arum namahayag nga seguradong usa ka kulbahinam nga away ang mahitabo tali sa duha ka boksidor nga napanglantawan niya nga usa unya ka kusug nga kandidato isip ‘Fight of the Year’.
“This could be one of the fights of the year, it should be a great fight†matud pa ni Arum.
Ang Estrada-Melindo showdown maoy fight card nga atangan sa mga boxing fans didto sa Macau sa dili pa ipahigayun didto ang gipaabot nga Manny Pacquiao-Brandon Rios showdown sa Nobiyembre 24. (BANAT PALARO)
- Latest
