Atty. Rex Mangubat, ex-varsity, gradwado sab sa accountancy

CEBU, Philippines - Sukad ako nag-cover og sports sa The Freeman, kanunay akong makadungog ug mga sugilanon sa kalamposan sa mga varsity players sa basketball nga naningkamot samtang nagtungha aron molampos kay dili sa tanang higayon sila mag-basketball.

Busa, matag makahibawo ako nga dunay mga varsity players nga migradwar sa ilang kurso, malipay kitang magpaminaw kay buot pasabot naninguha kanang bataa ug duna siya'y ambisyon sa iyang kinabuhi.

Usa sa labing bag-ong ehemplo nga atong ipaambit karon mao ang kanhi varsity player sa University of Southern Philippines-Foundation (USP-F) Panther nga si Rex Mangubat nga dugay na kaayo nakong higala kinsa bag-o lang mipasar sa bar exam nga giilang maoy labing lisod nga pasulit tungod sa kagamay sa passing percentage.

Dihang nasayod ako nga mikuha'g abogasiya si Rex, dugay akong wala makatuo kay kanhi sa player pa siya sa USPF ug ingon man sa commercial tournament diin usa siya sa orihinal nga sakop sa GMC Tortillos sa Cebu Basketball Federation (CBF) ubos ni coach Jun Tan, medyo may pagkahilumon man kini si Rex ug dili kaayo estoryador.

Sa wala pa siya motungha sa USPF, mikuha una'g kursong accounting si Rex diin migradwar siya didto sa University of San Carlos ug dayon mibalhin sa USPF ug miduwa isip college varsity ug usa ka tuig ubos ni coach Raul Latonio Sr.

Migradwar sa USP-F si Rex niadtong 2008 ug human siya mogradwar sa kursong abogasiya sa miaging tuig, mikuha siya sa bar exam ug wala niya damha nga ang korte nga iyang giduwaan kanhi, lain na sab nga korte---dili na basketball court kon dili trial court na. Didto siya mag-review sa Manila sa San Sebastian College apan human sa tulo ka buwan nga review, iyang gisakripisyo ang uban niyang oras alang sa usa ka self-study nga nagbunga og tam-is nga prutas sa kalamposan.

Matod pa ni Rex, ang iyang classmate ug roommate sa ilang pag-review sa Manila nga si Dave Martin Padoga usa na sab karon ka abogado.

Sa kasamtangan, nangita pa si Rex og usa ka law firm nga iyang kasudlan alang sa iyang "law practice" ug matod pa niya nga gusto siyang mahimong usa ka inilang Civil ug Commercial lawyer.

Ang iyang kanhing suod nga higala nga si Jett Latonio nga anak ni coach Raul, usa na sab karon ka Mechanical Engineer ug tungod sa paningkamot, dili lang kay ilang gipaila sa katawhan nga maayo lang sila sa duwa apan ilang gipamatud-an nga mas maayo silang ehemplo sa tanang mga basketball players nga angayan gyud panaminan sa uban.

Mapasigarbuhon kaayo si coach Latonio nga ang uban niyang mga players nga kanhing ubos sa iyang coaching tenure nagmalampuson sab sa ilang mga napiling kurso.

Lakip kanila mao si Bonifacio "Bogart" Nemoenozo III nga usa na sa Electronics and Communications  Engineer (ECE), Glenn Pendang nga usa sab ka ECE, Kim Oblimar ug Jeremiah "Ayn" Latonio, ang lain pang anak ni coach Latonio nga usa na ka Registered Nurse.

Wala mahikalimot si Rex sa iyang kanhi kinabuhi isip usa ka varsity player ug naglaraw siyang makigkita ni coach Latonio ning pipila ka adlaw aron iyang mahimamat og usab.

7th CESAFI Partner's Cup. Karong Domingo na Abril 14 sugdan ang ika-pitong season sa CESAFI Partner's Cup nga usa ka pre-season game alang sa Cebu Schools Athletic Foundation, Inc. (CESAFI) ug adunay unom ka teams nga mosalmot diha sa Cebu Coliseum pinangulohan sa defending champion UV Green Lancers.