Magis Eagles daog batok Ormoc Eagles
ORMOC CITY, Philippines – Gikunis-kunis sa Sacred Heart School-Ateneo de Cebu (SHS-AdC) Magis Eagles ang ilang karibal nga agila gikan sa Ormoc pinaagi sa pag-iskor og 102-49 nga kadaugan batok sa host team New Ormoc City National High School (NOCNHS) Eagles didto sa Ormoc Superdome kaniadtong Sabado sa gabii.
Ang maong duwa maoy usa ka knockout game sa Eastern Visayas finals sa Seaoil National Basketball Training Center (NBTC) Elite League.
Wala dayon manginit sa pagsugod ang Magis Eagles ug nahimong usa ka low-scoring ang first period, 12-5 apan gikan niadto, nahimo dayon kining 43-20 atol sa halftime, miburot ngadto sa 77-32 human sa third period ug padayong naghuramentado sa fourth quarter aron modaug og 53 puntos.
Duha ka sagunson nga baskets ni Rendell Senining maoy nakapukaw sa Magis Eagles ug nasundan sab kini sa laing duha ka baskets ni Arc Gabrielle Araw-araw aron molabaw sila'g double figures sa labing unang panahon pipila lang ka minutos sa wala pa ang halftime break.
Na-outscore sa mas tag-as ug mas preparadong Magis Eagles ang gamitoy nga Ormoc Eagles, 31-15 sa second period ug gibombahan ang ilang kontra ug laing makabungog nga 34-12 scoring run aron moburot ang labaw ngadto sa masipang 45 puntos.
Ang maong sangka gibiyaan sa mga fans ug usa sa misaksi mao ang kanhi Purefoods Hotdogs player nga si Rey Evangelista kinsa lumad nga taga Ormoc.
Molarga padung sa Manila ang Magis Eagles unya sa Marso 3 alang sa NBTC national finals diin sila maoy two-time defending champion ug sila sab maoy three-time Cebu City champions gawas pa sab sa ilang titulo isip Cebu Schools Athletic Foundation, Inc. (CESAFI) champions.
Ang hugot nga depensa sa Magis Eagles nga gihimo sa mga guards nga naglakip kanilang Senining, Araw-araw, Giovanni Laguyo ug Jair Igna maoy nakapugos sa Ormoc Eagles nga makahimo'g daghang turnovers.
Si Zacky Huang nga maoy usa sa ilang mga rookies, maoy nangu sa Magis Eagles sa iyang 22 puntos ug midugang si Ochea og 18 puntos. Parehong miamot og 12 puntos matag usa silang Senining ug Miguel Competente.
Ang batang Ormoc nga si CJ Sano kinsa maoy ilang MVP sa inter-schools, mihimo'g 10 puntos.
Puntos matag usa:
SHS-AdC (102)– Huang 22, Ochea 18, Senining 12, Competente 12, Padilla 8, Galvez 8, Araw-araw 7, Jaboneta 6, Igna 6, Cercado 6, Laguyo 4, Ecarma 4, Doyon 4, Fabian 2.
NOCNHS (49)– Sano 10, Arena 10, Hermosilla 9, Cabahug 5, Andriano 5, Angelio 3, Potoy 2. Halftime: 43-20. (BANAT SPORT)
- Latest
