Pistons nakabunal

 Wala makahuygo ang Miami Heat batok sa Detroit Pistons ilabi na gyud sa bench player sa Pistons nga si Will Bynum kinsa mipugas og 25 puntos uban sa iyang 10 ka assists aron baswaton ang iyang team ngadto sa 109-99 nga kadaugan kagahapon sa nagpadayong duwa sa NBA didto sa Auburn Hills, Michigan.

 Bisan pa sa 35 puntos gikan ni LeBron James, wala magsilbe ang Heat kinsa nagduwa nga wala si Dwyane Wade kinsa suspendido og usa ka duwa isip silot dihang tuyo niyang gilabyog og kusog ang iyang paa nga nakapatid ngadto kang Ramon Sessions sa Charlotte Bobcats.

Ang mga reserve players sa Detroit kinsa mikolekta og 85 puntos dihang napilde sila batok sa Atlanta, nagkumboya og laing 64 puntos batok sa Heat kagahapon diin miamot si Charlie Villanueva og 18 puntos ug si Austin Daye midugang og 11 puntos aron tabangan ang Pistons sa pagputol sa six-game winning streak sa Miami.

''Their bench came in and turned it up about 17 notches. We let them get into a comfort zone in the second quarter, and after that, they were making all kinds of contested shots,'' matod pa ni James.

Midugang siya sa pag-ingon ''It's hard to make any kind of run when a team keeps doing that to you.''

Unang mi-iskor og sagunson 10 puntos ang Heat ug naglabaw pa gani'g 15 puntos human sa first quarter apan kalit lang mibalitok ang hangin pabor ngadto sa Pistons kinsa naka-outscore sa Miami, 41-20 didto sa second period.

Si Chris Bosh mibahug og 28 puntos alang sa Miami kinsa naka-apas sa ilang 17 puntos nga biya sa sayong bahin sa  fourth period apan daling misukli ang mga reserves sa Detroit kinsa permanente kaayo'g pulso.

Ang big man nga rookie sa Pistons nga si Andre Drummond mi-iskor sa ilawom ug laing puntos gikan ni Villanueva human sa turnover ni James ug ang three-pointer ni Bynum maoy nag-inat pagbalik sa ilang labaw ngadto sa double digits sa iskor,  88-77. (GGM gikan sa NBA.com) (BANAT NEWS)