Keiz Bj Motocross Final Leg sa Nobiyembre 25

CEBU, Philippines - Higpit nga kompetisyon sa mga mapangahasong riders ang giatngan pinaagi sa Round 10 sa 1st Keiz BJ Motors-Phoenix Cyclomax Titans Motocross Series karong Domingo didto sa Tuburan racetrack sa amihanang bahin sa Sugbu.

Pagaulohan og "Mayor Democrito Diamante Birthday  Celebration Motocross Competition," ang usa ka adlaw nga lumba magsilbeng final leg sa maong series.

Ipahinungod usab kini sa ika-51 nga kasumaran sa adlaw'ng natawhan sa tinahod ug pinanggang mayor nga si Diamante sa Nobiyembre 30, dungan usab sa National Thanksgiving Mass sa bag-ong Sugbuanong Santo nga si San Pedro Calungsod.

Gipaabot nga dul-an sa 100 riders ang moladlad sa talagsaon nilang talento sa tagsa-tagsa ka dibisyon.

Pangulohan kini ni multi-titled Davaoeño daredevil Kimboy Pineda nga maoy lig-ong contender sa expert division.

Si Pineda, ang labing masidlakon nga rider sa Mindanao, gilauman makabagat og higpit nga kompetisyon gikan sa iyang mga karibal sama nilang Winsor Famorca, Cyril Tariman, managsuong Abellar nga sila si Juvenille ug Jovannie ug uban pa.

Si race organizer ug Keiz BJ  Motors big boss Siegfred Ornopia, kinsa usa usab ka champion rider ug award-winning sportsman miawhag sa mga riders gikan sa nagkalain-laing dapit lukop nasud sa pagsalmot sa maong kompetisyon.

Gilauman ni Ornopia ang partisipasyon sa Dr. Medina Racing Team sa Ozamis City, managsuong JP ug Pewee Galia sa Maasin City ug uban pang mga dekalibreng riders tibuok nasud.

Gawas sa expert, lain pang kategoriya nga tigian mao ang intermediate, novice, executive A, B ug C, executive selection limited edition, beginners selection, beginners open production, mini 85cc, mini 65cc, peewee, local enduro ug "habal-habal & wanggits" showdown.

Mokabat ngadto sa P100,000 nga ganting salapi ang gitagana alang sa mga mananaog sa maong kompetisyon nga namugna usab pinaagi ni Tuburan Brgy. Capt. Wilfredo Diamante uban  sa iyang igsuon nga si municipal councilor Danilo Diamante.

Ang overall champion sa tagsa-tagsa ka dibisyon pasidunggan uban sa "Rider of the Year" atol sa awarding rites sunod bulan sa wala pa matinong petsa ug binyu.

Hayag na kaayo ang anak ni Ornopia nga si Brylle nga mapasidunggan human kini mag-una sa kinaham niyang 85cc division ug si Russell Gungob sa executive A.

Gipahibalo usab ni Ornopia nga gawas sa mga freebies, ang tanang riders makapahimulos og libreng gasolina niining  lumba  nga gipaluyohan sa  Phoenix  Cyclomax Titans, Haojue Phils. Motolite  ug sa RMO Motor Parts.

Alang sa dugang mga pakisayod, mahimong motawag sa 3602873, 09238290932 o di ba sa 09177433152. (BANAT NEWS)