Bustamante igaganti si Reyes sa pagharap kay Ko
MANILA, Philippines - Ipaghiganti ang pagkatalo ng kumpadre ang isa sa balak gawin ni Francisco Bustamante sa pagbangga kay Ko Pin Yi ng Chinese Taipei sa pagpapatuloy ng Philippine Bigtime Billiards (PBB) Face Off Series bukas sa PAGCOR Airport Casino sa Parañaque City.
“Igaganti ko si Pareng Efren (Reyes),” bulalas ni Bustamante. “Hindi ko bibiguin ang mga kababayan ko.”
Si Ko ay sariwa sa 9-4 panalo laban kay Reyes sa unang sargo ng PBB sa 2012 na makikilala rin bilang Philippines vs Asia.
Dala ng magandang panalo, si Ko ay mas pinapaboran laban kay Bustamante sa betting odds Sports Betting Mega Sports World.
Lumalabas na may dibidendong $2.02 ang bawat $1 na taya para kay Bustamante laban sa $1.55 sa $1 pusta para sa Taiwanese pool player.
Ang palarong ito ay inorganisa ng Mega Sports World at BRKHRD Corp. at mapapanood sa Solar Sports, Sky Channel 70 at Destiny Channel 34 bukod sa internet gamit ang websites na www.megasportsworld.com at www.philippinebigtimebilliards.com.
Ikalawang pagkakataon na masasalang si Bustamante sa race to 9, 10-ball, winner’s break format na palaro at ang una ay nangyari noon pang Nobyembre at tinalo nito ang sikat na si Daryl Peach ng Great Britain sa dikitang 9-8 iskor.
- Latest
- Trending
