Laban nina Donaire, Vazquez lalong umiinit

MANILA, Philippines - Hindi pa man sila nagki­kita ay nag-umpisa nang uminit ang dugo nina Nonito ‘The Filipino Flash’ Donaire, Jr. at Wilfredo Vazquez, Jr. laban sa isa’t isa.

Kahapon ay uminit ang ulo ng 29-anyos na si Donaire nang malaman na sumama ang loob ng asawa ni Vazquez na si Jackelyn Roman Vazquez sa sinasabing tweet ng Filipino world bantamweight champion.

“I didnt disrespect no woman! She came at me disrespectful. Dnt know what her problem is but whatever aint trippin,” wika ni Donaire sa kanyang Twitter account kahapon.

Ang asawa ni Donaire na si Rachel Marcial ang si­nasabi ni Jackelyn na nagkalat na takot ang kanyang asawa sa tubong Talibon, Bohol.

“Give me a link, a picture, recorded message...something. I wanna see what crap I was talking about@wv2,” sagot naman ni Rachel kay Jackelyn.

Nakatakdang labanan ni Donaire si Vazquez para sa bakanteng World Boxing (WBO) super bantamweight title sa Pebrero 4 sa Alamodome, San Antonio, Texas.

Nagdadala si Donaire ng 27-1-0 win-loss-draw ring record kasama ang 18 KOs slate, samantalang may 21-1-1 (18 KOs) card si Vazquez, naisuko ang da­ting hawak na WBO super bantamweight belt nang matalo kay Mexican Jorge Arce noong nakaraang taon.

Samantala, mapapano­od sa ABS-CBN ang bak­bakang Donaire -Vaz­quez sa Linggo (Feb. 5), alas-10:00 ng umaga sa double-header.

Ang co-main event ng double-header na pina­magatang “Welcome to the Future” ay ang laban na­man para sa WBO middleweight ng mga Mexicanong boksingerong sina Julio Cesar Chavez Jr. at Marco Antonio Rubio.

Ipapalabas din ang title fight ng dalawa sa Studio 23, ala-una ng hapon.