Clamor bagong coach ng Perpetual Altas spikers

MANILA, Philippines — Kinuha ng University of Perpetual Help system DALTA si Dexter Clamor bilang bagong head coach ng Altas men’s volleyball team para sa parating na NCAA Season 102.

Pinalitan ni Clamor si Michael ‘Macky’ Cariño na hinawakan ang Altas spikers sa Season 100 at 101 kung saan bigo silang makapasok sa finals.

Isasama ni Clamor sa kanyang coaching staff sina dating Altas Spikers Sandy Montero at EJ Casaña na parehong naglaro sa Cignal sa Spikers’ Turf.

Iginiya ni Clamor ang HD Team Awesome sa anim sa siyam na Spikers’ Turf titles ng Cignal.

“Well, nu’ng tinawagan ako to offer the position, honestly, I was surprised. But at the back of my mind, I felt that maybe it’s time to give back to my alma mater,” ani Clamor na isang dating player ng Altas.

Bilang isang star setter, tinulungan ni Clamor ang Perpetual na makopo ang back-to-back NCAA championships sa kanyang collegiate years.

Hahawakan ni Clamor sa Altas sina holdovers John Castil, Dexter Arrozado, Klint Mateo, Charles Pallasa, James Pascua, Justin Favila, Ike Jolaton Nash Abenoja, Rookie of the Year at Freshman of the Year Marc Tangon at 2nd Best Middle Blocker awardee Jester Bornel.

Nasa tropa rin sina rookies Daryll Torio, Dave Borasca, John Penaroyo, JP Noblefranca, Steven Corpuz, Josh Cubar Dino Espiritu at Marius Calijan.

“One of my biggest goals is to bring back the championship culture sa Perpetual. Iyong legacy na iniwan ni coach Sammy,” ani Clamor.

“For the past two seasons, hindi nakapasok sa semifinals ang team. So I know na malaking challenge ito. But I see it as an opportunity to help rebuild the program, develop the players, and bring Perpetual back to where it belongs,” dagdag nito.