Manginsay-Redulla pair bigo sa Para Games gold
NAGOYA, Japan — Nakuntento sa silver medal sina Lhey Manginsay at Wilfred Redulla matapos matalo sa mixed doubles Class XD17 finals ng 5th Asian Para Games kahapon dito.
Minalas ang Manginsay-Redulla tandem kina Paralympic champion Zhao Shuai at Asian Para Games silver medalist Xiong Guiyan ng China, 7-11, 11-9, 4-11, 6-11, sa finals sa Sky Hall Toyota.
Ito ang unang medalya ng Team Philippines sa table tennis matapos ang silver medal ni Paralympic bronze medalist Josephine Medina sa Jakarta edition walong taon na ang nakakalipas.
Ang silver nina Manginsay at Redulla ang dumagdag sa naunang dalawang golds, isang silver at isang bronze para sa 16th spot ng delegasyon sa medal tally.
Sa Rainbow Pool ng Nagoya City General Gymnasium, bigo si Arjay Alegarbes na malangoy ang kanyang ikalawang gold medal nang pumang-lima sa men’s 100-meter butterfly S14 sa kanyang oras na 58.93 segundo.
Lalaban din sa finals sina gold medalist Ernie Gawilan sa men’s 100-meter backstroke S7 at Edwin Villanueva sa men’s 100-meter breaststroke SB7 at 100-meter backstroke S8, Muhaimin Ulag sa men’s 100-meter butterfly S14, Raemund Adefuin sa men’s 100-meter backstroke S6 at ang mixed 4x50-meter freestyle relay squad.
- Latest
