Ex-PBA stars ng SSC tatakbo sa 2nd Stags Run 2012
MANILA, Philippines - Makikiisa ang mga dating kilalang basketbolista ng San Sebastian College sa paglarga ng 2nd Stags Run 2012 sa Enero 15 sa ASEANA City sa harap ng Department of Foreign Affairs.
Sina Paul Alvarez at Rommel Adducul ang mga mangunguna sa mga kilalang basketbolistang nagpasikat sa Stags na makikiisa sa programa para patingkarin ang proyektong tinagurian din bilang “Takbo para sa Edu-Misyon.”
Sina Stags coach Topex Robinson, Calvin Abueva, Ian Sangalang, Ronald Pascual at Anthony Del Rio ay sasali rin sa patakbo na ang layunin ay makalikom ng pondo na ilalaan sa educational missions sa Palawan at West Africa.
“We encourage not just our alumni but also others to join in our race because this is really being done for a cause,” wika ni Fr. Anthony Morillo, OAR na siya ring pangulo ng San Sebastian College- Recoletos.
Lalahok din si Pasay City Mayor Antonino Calixto na nag-aral sa San Sebastian sa kaganapan na isasabay din sa paggunita sa ika-65th founding anniversary ng paaralan.
Ang labanan ay sa 3K, 5K at 10K at magsisimula ang patakbo mula alas-6 ng umaga.
Halagang P500 ang registration fee sa lahat ng kategorya at ang top three sa 10K ay tatanggap ng P6,000, P4,000 at P2,000, ang 5K ay may P5,000, P3,000 at P2,000 at 3K ay mayroong P3,000, P2,000 at P1,000 premyo.
“We hope to attract and draw as many participants as last year but if we could get more to join our event, the better for everybody,” pahabol ni Fr. Christopher Maspara, OAR, pa pinuno ng organizing committee.
- Latest
- Trending
