Ornopia miposa'g 5 ka triples

CEBU, Philippines - Gipakita ni Siegfred Ornopia nga dili lang siya batid sa motocross, apan kulba usab kini sa natad sa basketbol dihang milansang kini og lima ka triples   atol sa kadaugan sa iyang team Keiz BJ Motor Sales batok sa MS Motosuit, 73-57 sa 1st Keiz BJ Inter-Company Basketball Tournament niadtong Lunes sa gabii didto sa Barangay Tabok gym sa Mandaue City.

Si Ornopia mikadlit og kinatibuk-ang 21 puntos aron pangulohan ang Keiz BJ Motor nga miabante ngadto sa semifinals bitbit ang limpiyong 4-0 nga baraha.

Wala kapugngi si Ornopia gikan sa three-point arc ug ang iyang lima ka triples daku'g natampo paglubong sa MS Motosuit ni team owner ug playing coach Lou Ornopia.

Lain pang semifinalists mao ang Cast Alloy (4-0), Dedon (4-1) ug MS Motosuit (3-2).

Mikulit sab og double figures sila si Ervy Ermac nga adunay 19 puntos ug si Miguel 'Amboy' Antiga sa iyang 16 puntos sa kadaugan sa Keiz BJ Motor Sales ni coach Moluk Gonzaga.

Ang pilderong MS Motosuit gipangulohan ni Lou Ornopia pinaagi sa iyang 13 puntos, gisundan ni Miñoza nga adunay 11 puntos.

Sa laing duwa, ang RMO Motor Parts midaog pinaagi sa 3-point play ni Edu Wangkig sa iskor nga 59-57 batok sa Pro Speed.

Dumadaog unta ang Pro Speed dihang nilabaw kini og uno punto, 57-56 sa tiwasunong oras, apan si Edu nakakubit og foul gikan ni JC Obligado atol sa iyang paglusot nga maoy mihatod kaniya alang sa bonus free throw nga maoy miselyo sa ilang kadaugan.

Si Edu miposa og 12 puntos, apan     si Benjie Nellas maoy topscorer sa RMO nga adunay 15 puntos.

Nangulo sa pilderong Pro Speed mao ang ilang playing coach nga si Renante Jubay, kinsa mipabuto og 13 puntos.

Lain pang semifinalists mao ang Cast Alloy (4-0), Dedon (4-1) ug MS Motosuit (3-2) nga nakabaton og twice-to-beat advantage batok sa top two winners sa wildcard.

Ang maong torneyo pahinungod sa magtiayong Siegfred ug Ellein Ornopia alang sa tinuig nga kapistahan sa Batang Hesus Señor Sto. Niño sa Barangay Pagsabungan, Mandaue City. (BANATSPORTS)