Nationals inilaglag ng Koreans sa quarters
GUANGZHOU – Tuluyan nang natapos ang kampanya ng Smart Gilas Pilipinas sa 16th Asian Games men’s basketball competition matapos yumukod sa South Korea, 66-74, sa kanilang knockout quarterfinal match kahapon.
Humakot si 6-foot-9 Fil-Tongan Asi Taulava ng 23 points galing sa kanyang 10-of-12 fieldgoal shooting para sa Nationals.
Ang dalawang mintis na freethrows ng 37-anyos na si Taulava sa huling 38 segundo ang tuluyan nang nagbigay sa Koreans ng isang semifinals ticket.
Bago ito, bumangon ang RP Team mula sa isang 12-points deficit sa third quarter para makalapit sa South Korea sa limang puntos sa payoff period.
Nagdagdag naman si JV Casio ng 12 points, habang may 8 markers at 8 rebounds si Kelly Williams.
Pinangunahan ni Oh Se-Keun ang mga Koreans mula sa kanyang 19 points.
"The Philippines is a really tough team. Today it was really hard to pull out the win," sabi ni Lee Seung-Jun, nagtala ng 12 points at 3 blocked shots. "Today my offense was not so good, I had to do something for my team and concentrated on defense and rebounds."
Nakatakda pang labanan ng Japan ang North Korea, samantalang haharapin ng Iran ang Jordan at sasagupain ng Asian Games champion China ang Qatar sa quarterfinals knockout.
- Latest
- Trending
