Simpolang kampiyon sa 2nd FYA cagefest

CEBU, Philippines - Miarangkada ang Simpolang Barbekyuhan ni playing coach Noel Medalle sa nanghinapos nga bahin sa duwa aron mapukan ang Viking Haulers, 85-81 ug ingon man pag-angkon sa korona sa 2nd F. Llamas Youth Association (FYA) basketball tournament didto sa Alta Vista gym sa Brgy. Pardo, ning dakbayan.

Si Butoy Tabares maoy nangulo sa Simpolang pinaagi sa iyang 21 puntos nga igo na kaayo alang kaniya nga ilhong MVP.

Miwadwad og maayo si Tabares sa second half ug ang iyang mga krusyal nga baskets sa katapusang dos minutos maoy nagselyado sa ilang kadaugan.

Si Ryan Villaver midugang og 18 puntos alang sa Simpolang, samtang si Nico Laborte, kinsa napiling sakop sa Mythical Five, miabuno'g 13 puntos.

Ang Viking Haulers gipangulohan ni Baeng Medalle ug Toper Limbaga, ang laing sakop sa Mythical Five, kinsa mipabuto og 19 puntos matag usa.

Ang laing duha nga mga sakop sa Mythical Five mao sila si Dexter Caballero sa third placer Park ‘N Go Bakeshop ug Onyot Masongsong sa Heartfelt Angels .

Si Dodong Cabigas sa Viking Haulers maoy miangkon sa Sportsmanship Award.

Sa sayo pa, ang Park ‘N Go Bakeshop maoy miangkon sa ikatulong dapit pinaagi sa pagpukan sa Heartfelt, 70-69. (BANATSPORTS)