Bustamante kinapos kay Immonen sa Challenge of Champions
MANILA, Philippines - Hindi nakayanan ni Filipino Francisco “Django” Bustamante ang ‘pressure’ matapos kumulapso kay defending champion Mika “Iceman” Immonen ng Finland sa kanilang sudden-death match para sa kampeonato ng 2010 International Challenge of Champions na idinaos sa Mohegan Sun Casino sa Uncasville, Connecticut, USA.
Inangkin ni Immonen, naghari sa 2009 WPA World Ten-Ball Champion, ang first set, 5-3, ngunit nakabangon naman si Bustamante, ang WPA World 9-Ball Champion, sa second set, 5-2, patungo sa sudden-death game, one rack decider sa winner-take-all format ng torneo.
Sinikwat ni Immonen ang kanyang pangalawang sunod na International Challenge of Champions kasama ang $25,000 top prize.
Nauna dito, pinayukod muna ni Bustamante sa isang sudden-death game si Briton Karl Boyes.
Iginupo naman ni Immonen si German Ralf Souquet, 5-3 at 5-4, upang ayusin ang kanilang finals match up ni Bustamante.
- Latest
- Trending
