"Do or Die" game tali sa Cebu Niños vs MisOr

CEBU, Philippines - Usa ka kasaysayan ang ilogan karon sa M.Lhuillier Kwarta Padala Cebu Niños ug Misamis Oriental Meteors isip labing unang kampiyon sa Tournament of the Philippines (TOP) sa ilang "do or die" game karong alas-6 sa gabii diha sa Cebu Coliseum.

Nameligro nga maharus didto sa balwarte sa Meteors, ang Cebu Niños misalig sa katakus sa kanhi University of the Visayas (UV) Green Lancers nga si Mark Ababon kinsa mipasulod og duha ka krusyal nga tira aron tablahon ang serye, 2-2 sa ilang "best-of-five" finals series sa iskor nga 73-72.

Bisan paman og anaa kanila ang homecourt advantage, dili gihapon mokompiyansa ang Niños ni teamowner Michel J. Lhuillier ug coach Raul "Yayoy" Alcoseba, tungod kay nailhan ang Meteors nga koponan nga mipilde kanila sa ilang balwarte sa Game-1.

"It was a gamble that I took and I thought Ababon being a slasher type of a player, can provide us some scoring since they (Meteors) were tightly guarding our shooters," matud pa ni Alcoseba.

Si Ababon kinsa maoy mihulip sa na-fouled out nga si Stephen Padilla, dihang gibiyaan sila og tres puntos sa MisOr, 69-72, mibali sa duwa human niya mapugos si Reed Juntilla sa usa ka offensive foul sa krusyal nga oras sa duwa.

Didto gisugdan ni Ababon ang iyang pagmilagro human niya giatake ang depensa sa MisOr sa nahibiling 50 segundos sa duwa nga maoy misegurado sa duwa alang sa Cebu.

Aduna pa untay kahigayunan ang host team nga makuha ang labaw , apan nasipyat ang jumper ni Eder Saldua dayung bagting sa final buzzer.

Puno usab sa pagmahay si coach Jun Noel sa Meteors nga naglabaw pa og nuybe puntos, 59-50 sa sayung bahin sa second half sa pagpangulo ni Patrick Cabahug kinsa maoy top scorer sa iyang 18 puntos.

Si Mark Magsumbol maoy bugtong player nga mirehistro og double digits alang sa Cebu pinaagi sa iyang 16 puntos, samtang sila si Ababon, Padilla ug Ariel Mepaña miposa og nuybe puntos matag usa. (BANATSPORTS)