JT Gullas naka-gold

CEBU, Philippines - Midaog og bulawan ang masaarong Cebu go-kart racer nga si JT Gullas sa international event pinaagi sa Round 2 sa 2010 Asian Karting Open Championships didto sa Kartodromo de Coloane sa Macau, China.

Ang batan-ong Gullas misakmit og ROK Junior title nga nakapahimo kaniyang usa sa top karters karong panahona sa dul-an sa 60 riders gikan sa nagkalain-laing kanasoran nga misalmot sa kompetisyon.

Ang kadaugan ni Gullas nakasalbar sa RP squad dihang ang ubang mga pambato nakasugat og kalisdanan sa tagsa-tagsa nilang kampanya.

Si Christian Gaddi miangkon og bronze sa mini ROK class, samtang si Christian Villenueve nalandig sa ikaupat sa Formula 125 open junior category.

Ang Round 3 gikatakda karong Agosto 6-8 didto sa Sentul Circuit, Indonesia, ang Round 4 balik sa Macau sa Oktubre 8-10 ug ang Round 5 sa Nobiyembre 5-7 didto sa Pattaya,Thailand. – BANAT NEWS