Looc, Subangdaku nanghawod sa volleyball event

CEBU, Philippines - Nanghawod ang Looc ug Subangdaku sa ilang tagsa-tagsa ka dibisyon sa 3rd Mayor Jonas Cortes Cup volleyball tournament didto sa Mandaue City Cultural and Sports Complex.

Ang Looc napilde sa Umapad sa first set, 12-25, apan nakarekober sa mosunod nga duha ka sets, 26-24, 25-19 aron sakmiton ang korona sa women’s division.

Nadasig og duwa ang Looc tungod sa presensiya ni Brgy. Capt. Sol Cabahug ug team owners Rene ug Linda Froilan.

Bisan sa kapildihan sa Umapad, ang 2009 Nestea Beach volley champion Apple Saraum mao ang giilang MVP.

Sa pikas bahin, ang Subangdaku nga gipangulohan ni MVP Roderick Arenasa mipukan sa Maguikay human ilang giharos ang tulo ka sets, 25-18, 25-15, 25-19 aron maangkon ang titulo sa men’s division.

Gawas sa mga tropeyo, ang mga kampiyon modawat og P20,000 matag usa atol sa awarding ceremonies karong Mayo 5.

Si Mandaue City Mayor Jonas Cortes mao mismo ang motunol sa mga ganti ngadto sa mga mananaog. 

Karong Mayo 2, dunganon sab nga pasidunggan ang mga winners sa basketball, softball, badminton, tennis ug Mandaue City Run. – BANAT NEWS