'Grandslam' tuyo sa Pajo

CEBU, Philippines - Naghinam-hinam na ang back-to-back champion Pajo National High School (PNHS) nga motanom og "grandslam" title sa Visayas Elimination sa 7th Shakey's Girls Volleyball League nga sugdan karong Abril 20-25 diha sa Mandaue City.

Si PNHS head coach Fr. Rolando Manayon mipadayag nga mosalmot gihapon sila ning tinuig nga kompetisyon ilabi na nga sila ang defending champion.

Giklaro hinuon ni Manayon nga mapalta sila sa ilang unang duwa tungod kay ang Pajo belles morepresentar man sa Central Visayas sa Palarong Pambansa nga mosikad sa susamang adlaw didto sa Tarlac City.

Ang pag-apil sa Pajo seguradong makahatag og   nindot nga duwa ngadto sa higpit nga karibal University of Southern Philippines Foundation (USPF), ang nine-time Cebu Schools Athletic Foundation Inc. (CESAFI) volleyball titlist sa secondary division.

Gawas sa Pajo ug USPF, ang laing teams nga nipadayag sa ilang partisipasyon ning tulo ka weekend nga kompetisyon mao ang University of San Carlos (USC), University of San Jose-Recoletos (USJ-R), Abellana National School (ANS), Don Gerardo Ouano Memorial National

High School (DGOMNHS), Mandaue City Comprehensive National High School (MCCNHS), Cabancalan National High School (CNHS), San Isidro Parish School (SIPS), Colegio de la Inmaculada Conception

(CIC)-Mandaue ug St. Theresa's College (STC).

Ang overall winner makakuha og luna alang sa 7th Shakey's Girls V-League National Finals nga ulohan og "Tournament of Champions" nga gikatakda sa ikaduhang semana sa Mayo didto sa Tacloban City.

Ang torneyo gipaluyohan sa Mikasa, Toby's Sports, Dunkin' Donuts ug MetroSports. – BANAT NEWS