Tiukinhoy angay nang mo-resign -- Aznar

CEBU, Philippines - Gihagit ni Southwestern University (SWU) president Ryan P. Aznar si Felix 'Boy' O. Tiukinhoy nga mokanaog na lang sa iyang posisyon isip commissioner sa Cebu Schools Athletic Foundation Inc. (CESAFI).

Si Aznar namahayag nga wala nay kapabilidad si Tiukinhoy nga mobarog isip commissioner sa CESAFI tungod sa mga sayop niining desisyon sa mga init nga isyu nga giatubang sa liga sa miaging tuig diin pipila ka mga coaches ug players ang gisilotan og "lifetime ban."

Sa usa ka press conference didto sa grade school office sa SWU, gibirahan ni Aznar si Tiukinhoy, kinsa iya usab nga gipasanginlan nga namakak sa tinuoray nga kantidad sa salapi nga nagasto sa pagka-injured ni SWU forward Clifford Maguate atol sa Game-2 sa 3rd CESAFI Partner's Cup niadtong miaging tuig.

Si Maguate gipaubos sa rehabilitasyon ubos ni Dr. Rhoel Dejaño diin migasto kini og P43,200 alang sa 72 ka sesyon ug P7,200 transportation allowance ug refund sa MRI nga nagkantidad og P8,580.

Apan sukwahi kini sa kantidad nga gipagawas sa CESAFI organizers ubos ni Tiukinhoy nga gamay ra og sumada nga P19,800 nga gibuak ngadto sa P15,780 nga salapi ug P4,020 balor sa usa ka box sa muscle tape.

Ang rehabilitation nagkantidad og P24,700 lakip ang pamasahi paingon ngadto sa Perpetual Succour Hospital ug MRI nga nagkantidad og P8,580. Ang SWU aduna pay kolektahon nga P13,480 nga refund, nga giangkon nga nabayran na ni Tiukinhoy.

Sa iyang bahin, si Tiukinhoy midepensa sa iyang kaugalingon ug nagkanayon nga nagkasinabot na sila ni Aznar nga bahinon ang galastuhon sa pagka-injured ni Maguate.

Laing basihan ni Aznar sa pagpa-resign ni Tiukinhoy mao ang pagtuis sa commissioner sa mga lagda sa eligibility sa usa ka magduduwa sa CESAFI aron hatagan og pabor ang ubang koponan sa liga sama sa pagbalhin ni Moncrief Rogado gikan sa USPF ngadto sa UC.

Katapusang rason sa kahiubos ni Aznar ngadto ni Tiukinhoy mao ang pagpataka niini og pahamtang sa silot   diin upat ka volleyball coaches ang gisilotan og "lifetime ban."

 Mihulga usab si Aznar nga dili mosalmot sa umaabot nga 2010 Partner’s Cup sunod Sabado ug huna-hunaon usab niya ang posibilidad nga mopalta sa sunod season sa CESAFI kun dili libkason ni Tiukinhoy ang "lifetime ban" nga iyang gipahamtang ngadto sa kanhi SWU point guard nga si Eliud Poligrates. – BANAT NEWS