ART naka-eskapo sa J-Art

CEBU, Philippines - Ang team ART ni team owner Art Arellano mipatapsing sa mas paboritong J-Art Sportsmaster,87-85 niadtong Biyernes sa nagpadayong 1st Punta Princesa Ball Club (PPBC) 2009 Vice Mayor Mike Rama Cup basketball tournament diha sa Vicente Sotto Memorial Gym sa barangay Punta Princesa, ning dakbayan.

Kanunay nga naggukod ang J-Art ug diha kini nakatilaw og labaw sa tunga-tungang bahin sa final period human sa tirada ni James Lloyd Noel. Apan dali ra usab kining nabawi sa ART ug miposte kini og kuwatro puntos nga bentaha, 86-82 sa katapusang 18 segundos.

Ang triple ni Glenn Birao maoy nakapasikit og balik sa J-Art, 85-86 sa nahabiling nuybe segundos, apan si Rowel Sumalinog nakakubit og foul ug ang iyang duha ka free throws maoy mihingpit sa ilang kadaugan.

Si Junel Villarosa maoy topscorer sa ART pinaagi

sa iyang 20 puntos, gisundan ni Ramil Hapin nga miabuno og 19 puntos ug si Keith Arellano miamot og 15 puntos.

Ang Sportsmasters gipangulohan ni Birao, kinsa mihipos og 18 puntos, samtang si Noel midugang og 15 puntos.

Sa laing duwa, ang Heartvit milubong batok sa undermanned nga JS Contractors sa iskor nga 116-98 alang sa ilang ikaduhang daog sulod sa upat ka duwa.

Ang Heartvit gipangulohan ni Rey Jumamel nga miposa og 16 puntos, si Reynold Zamora midugang og 15 puntos ug si Yan Reyes miabuno og 14 puntos.

Si Bunny Tecson maoy topscorer sa JS Contractors nga miburak og 26 gisundan ni Mat Vallejo nga mibahog og 22 puntos.

PUNTOS MATAG USA

Unang duwa:

ART (87) - Villarosa 20, Hapin 19, K. Arellano 16, Sumalinog 10, N. Arias 7, Soco 4, Libre 4, Navarro 2, A. Arellano 2, Vilbar 2, R. Arias 2

J-Art (85) - Birao 18, Noel 13, Regidor 11, Ferrer 11, Mante 6, Tecson 6, Perez 6, Pada 4, Te 4, Gonzaga 2, Bucton 2, Villaver 2

Ikaduhang duwa:

Heartvit (116) - Jumamel 16, Zamora 15, Reyes 14, Pasana 13, Sanchez 13, Mosqueda 12, Babatid 11, Lim 10, M. Arias 9, Tagalog 3

JS Contractors (98) - Tecson 26, Vallejo 22, Feliciats 17, Villalon 15, Caburnay 6, Cabunilas 4, Empacis 4, Canencia 2, Licaros 2   (BANATNEWS)