UV Green Lancers abante sab semis

CEBU, Philippines - Gilisud-lisod pa ang eighth-time champion University of the Visayas (UV) Green Lancers una nila maihaw ang University of Southern Philippines Foundation (USPF) Panthers, 69-65 ug miabante ngadto sa semifinals sa 9th Cebu Schools Athletic Foundation Inc. (CESAFI) basketball event niadtong miaging gabii diha sa USC Gym.

Ang taas nga championship experience sa Lancers maoy   gihimo nilang hinagiban aron mapapas sa ilang 18 puntos nga alkanse, 36-54 ug dali kaayo kini nilang nabadbad ngadto sa 13 puntos, 41-54 paghuman sa third period.

Mipabuhagay sab dayon og 10-0 run ang Lancers pagsugod sa fourth quarter uban ang hugot nga depensa aron gub-on ang kusog nga transition game sa Panthers, kinsa igo na lang naglabaw og tres puntos, 51-54 sa nahabiling 7:20 sa duwa. Ang Panthers mibawos aron inaton og balik ang ilang labaw, 57-51 sa three-point play ni Dennis Tabada, apan si Phil Mercader kalit lang nga nanginit ug miposa og siyam ka sunod-sunod nga puntos aron hatagan ang Lancers og uno punto nga labaw, 62-61 sa katapusang dos minutos sa duwa.

Katapusang nakatilaw og labaw ang Panthers sa iskor nga 63-62 kortesiya ni Fritz Dajalos, kay si Edrian Lao naka-iskor sa undergoal aron tunolan og balik ang Lancers og uno punto nga labaw, 64-63 ug wala na kini molingi pa sukad niadto.

Ang 6-foot-11 center nga si Gregory Slaughter wala kaayo kahuygo kalabot sa iyang opensa kay igo lang siyang mi-iskor og nuybe puntos, apan daku kini'g natampo sa depensa.  

Si Dajalos mao lang ang bugtong nakakuha og double figures alang sa Panthers

PUNTOS MATAG USA

UV (69) - Lao 15, Mercader 12, Dennison 12, Slaughter 9, Diputado 6, Cincoflores 5, Cabahug 4, Lasala 2, Manigque 2, Olivares 2

USPF (65) - Dajalos 19, Rivera 9, Tabada 9, Durano 8, Linao 6, Avila 5, Fuentes 5, Bardilas 2, Sedurifa 2   (BANATNEWS)