Management kampiyon sa CEMVEDCO Sportsfest

CEBU, Philippines - Gilangkat sa Management Team ni skipper Tony Piloton ang korona human ilang gipakaging ang mas tag-as ug mas batan-on nga Ermita Tanods pinaagi sa pag-iskor og 60-52 nga come-from-behind nga kadaogan kaniadtong Biyernes atol sa finals sa Cebu Market Vendors Development Cooperative (CEMVEDCO) 2009 annual sportsfest didto sa barangay Ermita open court.

Unang naglabaw ang Ermita Tanods ug bisan pa sa ilang 16-11 nga abante sa sayo pa, nakahigayon sila’g kontrolar sa duwa gikan sa second hangtod na ngadto sa third quarter tungod sab sa paningkamot sa ilang 6-1 nga snetro nga si Rod Cabras ug playmaker Jun Ando.

Taudtaud unang nasulbad sa Management ang opensa sa Tanods ug human nila pahugti ang ilang depensa, wala na makasustenir ang Ermita Tanods tungod sa pagpabuhagay og puntos gikan nilang Piloton, Jomar Rosales ug Jake Balongkit aron hingpit mapakgang ang dautang laraw sa Tanods.

Naputol gyud ang rally sa Tanods dihang misumbalik ang Management pinaagi sa ilang 22-9 scoring run ug didto misarasay na ang mga Tanods hinungdan sa ilang otso puntos nga kapildehan.

Si Paul Lemita miyagyag og 23 puntos ug si Benjie Miñoza mipakatap og 12 puntos alang sa Management Team.

Sila si Ando ug Cabras maoy nangu sa Ermita Tanods sa ilang 11 ug 10 puntos matag usa.

Sa sayo pa, ang Freedom Park misakmit sa ikatulong pwesto human ilang gilatos ang Chapter 1-A sa iksor, 73-60.

Si Jay Arcillar miburak og 26 puntos alang sa Freedom Park ug si Christopher Perez midugang og 20 puntos.

Ang pilderong Chapter 1-A gipangulohan ni Jun Quirol kinsa miposa og 17 puntos ug si Tata Detuya miabuno og 15 puntos.

Puntos matag usa:

First Game:

Freedom Park (73)— Arcillar 26, Perez 20, Tumulak 10, Coyoca 6, Badajos 4, Bacacao 4, Emnace 2

Chapter 1-A (60)—Quirol 17, Detuya 15, Pagador 14, Ruiz 12, Largo 2

Second Game:

Management (60)— Lemita 12, Miñoza 12, Rosales 7, Balongkit 6, Tago 5, Piloton 5, Goc-ong 2

Ermita Tanods (52)— J. Ando 11, Cabras 10, Dungog 8, B. Fajardo 7, E. Fajardo 6, Deiparine 4, Cabigon 2, Estrella 2, Posque 2, B. Ando 2. - Gabby G. Malagar