New york midaug na sab

CEBU – Nabugto ang unom ka sagunson nga pilde sa New York Knicks dihang ilang gipukan ang host Charlotte Bobcats sa iskor, 93-89 sa sangka sa National Basketball Association (NBA) didto sa Time Warner Cable Arena sa Charlotte, North Carolina.

Si Wilson Chandler mi-iskor og pito sa iyang 19 puntos sa kataposang upat ka minutos aron baswaton ang Knicks nga nahiagum na og sagunson nga unom ka pilde ug naghupot na karon og 2-0 nga record batok sa Bobcats batok sa ilang kanhi coach nga si Larry Brown.

Ang Knicks nakabangon og balik human mapapas ang ilang 17 puntos nga labaw batok ni Brown, ang kanhi coach sa Knicks nga gipalagpot human sa iyang miserableng 23-59 record sa regular season kaniadtong 2005-06 ug anaa karon sa una niyang tuig isip coach sa nagsukarap nga Bobcats.

Si Al Harrington midugang og 16 puntos ug may unom ka rebounds alang sa Knicks sa ikaduhang higayon diin gikan siya gihulbot sa bench samtang si Chris Duhon may 15 puntos ug si David Lee mitampo og 13 puntos.

Ang Bobcats gipangulohan ni Gerald Wallace kinsa mihipos og 21 puntos samtang si Boris Diaw mi-iskor og 20 puntos.

Sa laing duwa, midaug ang Atlanta Hawks batok sa Indiana Pacers sa ilang road game didto sa Conseco Fieldhouse sa Indianapolis, Indiana.

Ang Hawks gipangulohan ni Joe Johnson sa iyang 27 puntos samtang si Josh Smith midugang og 24 puntos ug si Mike Bibby mi-iskor og 15 puntos.

Ang pilderong Pacers gipangulohan gihapon sa ilang leading scorer nga si Danny Granger nga mibahug og 25 puntos ug si Jarrett Jack mitampo og 22 puntos.

Padayon pa karon ang duwa sa host Miami Heat batok sa naghagurus nga Cleveland Cavaliers kinsa nabiyaan pa og gamay ning pagsuwat.

Nagsaulog karon sa iyang ika-24 nga adlaw’ng natawhan si LeBron James, ang superstar sa Cavaliers apan maoy tuyo ni Dwayne Wade nga himoon pakyas ang iyang kasaulogan. (GGM) (BANAT NEWS)