Siso nakasulod semis sa Perlis

CEBU - Human sa iyang kaluhang kadaugan didto sa Langkawi, ang tennis princess sa Sugbu nga si Sally Mae Siso, mipakita na sab sa iyang talagsaong katakus dihang nakasulod kini sa semifinal round sa Perlis International Age-Group Compettion didto sa Perlis Sports Complex sa Kanger Perlis, Malaysia.

Nakasulod sa penultimate round si Siso sa University of San Carlos-South human nidaog sa iyang unang duha ka mga duwa.

Si Siso, kansang pag-apil sa four-leg sa Malaysia junior tennis circuit gipaluyohan sa Dunlop ug ni sports patron Jonathan 'Atan' Guardo, mipukan ni Archnaah Rajan sa Kuala Lumpur, 6-1, 6-0 sa wala pa niya makuha ang 6-0, 6-0 nga kadaugan batok ni Nur Alialyana Azman.

Sa doubles event, si Siso kinsa nakigtimbang ni Amore de Villieres sa South Africa, milubong sa tandem nilang nilang Tiara Hereena ug Macie Low, 9-1.   (BANAT NEWS)