MILTSC nidominar sa Mayor Radaza Cup

CEBU - Mipakita sa ilang kahanas ang Mactan Island Lawn Tennis Sports Club, Inc. (MILTSC) netters aron dominaron ang 2008 Lapu-Lapu City Fiesta Tennis Tournament nga giulohan og "Mayor Arturo ‘Boy’ Radaza Cup" niadtong Domingo didto sa tennis courts sa maong dakbayan.

Ang mga garbo sa MILTSCI mikolekta og upat sa unom ka kampiyonato sa maong usa ka bulan nga torneyo nga usa sa mga dakung kalihukan sa tinuig nga kapistahan sa ilang mahal nga patron Virgen de la Regla (Virgin of the Rule).

Sila si Rommel Pinote ug Titing Augusto maoy nangu sa kadaugan sa MILTSCI human ilang gipalayas ang tandem nilang Mike Odi ug Raymund Sambas, 8-5, aron paghari sa C Plus category.

Wala sab magpabitin si Cindi Chan, kapikas ni event organizer Ahong Chan ug partner niining si Edna Base nga mipakugang sa inilog nga sila si Cecille Rizon ug Marlyn Cortes sa Cecille's TC, 8-6, aron pag-angkon sa titulo sa Ladies division.

Sa age-group bracket, nanghawod sab ang MILTSCI. Si Josha Kinaadman yano kaayong mipukan ni Sharalyn Tuñacao aron pagdominar sa 12 years old and under division, samtang si Paul Abendan milampurna’s sab ni Jennifer Jaca sa Mactan Air Base TC sa susamang iskor aron pagsakmit sa korona sa 16-Under category.

Sila si Boy Malingin ug Andy Escoton sa Cecille's TC nakig-uban sa listahan sa mga kampiyon human ilang gipilde silang Mario Rizon ug Gil Montesclaros, 8-6, aron pagbira niini sa titulo sa Century Old class. Sila si Nanding Sagaral ug Val Rayas sa General Milling Corp. (GMC) TC maoy nanghawod sa C Minus category, apan gipaningot una sila og bogbog sa wala pa nila pildiha sila si Bro. Trangia ug Ruel Gelig sa Marigondon TC.

Gawas sa mga tropeyo, ang nagkadaiyang mga category champion nakadawat sab og P3,000 matag usa, samtang ang placers mibitbit og P2,000.

Si event chairman ug city councilor Junard ‘Ahong’ Chan mismo ang mitunol sa mga ganti ngadto sa mga mananaog inabagan ni tournament director Junjun Clarito. Dugang mga pahalipay ang giapud-apud ngadto sa mga mananaog sama sa TV racks, silver ware sets, rice cookers ug uban pa kortesiya sa Cecille's Enterprises pinaagi sa proprietor niining si Mario Rizon.

Mga sakop sa working committee nga nakatampo sab sa kalampusan sa maong torneyo naglangkob nilang Medjok Paden, PJ Vergara, Gil Vilo, Manjo Calo-oy ug Jun Bungot.  (BANAT NEWS)