Largo misakmit titulo sa Elite Men's Open A sa Mayor Radaza Cup

CEBU - Gipamatuod ni Francis Largo ang iyang kahawod batok ni Michael Quiñones apan milanat pa kini ngadto sa tulo ka sets una mabira ang championship trophy sa Elite Men’s Open A Category sa 2008 Lapu-Lapu City Fiesta Tennis Tournament nga giulohan og “1st Mayor Arturo Radaza Cup” niadtong Domingo didto sa Lapu-Lapu City tennis courts.

Gumikan niini, giprobahan ni Largo nga dili tsamba ang iyang 10-4 nga kadaugan batok ni Quiñones sa ilang exhibition match nga maoy misikad sa usa ka bulan nga kompetisyon niadtong Oktobre.

Giangkon ni Largo ang first set, 6-4, apan si Quiñones nakabawi sa second set, 6-4 pinaagi sa iyang powerful forehand ug high-bouncing shots aron pagtabla ug paghatod sa duwa ngadto sa rubbermatch.

Sa deciding set, ang managkaribal nag-iyahay og buhi sa ilang abilidad. Unang miarangkada si Largo aron pagposte og 3-0, apan si Quiñones mibawos ug nakatabla, 3-all. Hinuon, si Largo wala magpadala sa presyur ug maampingon kini sa iyang lihok hangtod nga iyang naangkon ang 6-4 nga kadaugan.

Si event organizer ug city councilor Junard ‘Ahong’ Chan mao mismo ang mihatag sa mga ganting salapi ug mga tropeyo ngadto sa duha ka magduduwa. Mitambong sab si tournament director Junjun Clarito sa maong kalihukan.

Sa C Minus action, sila si Nanding Sagaral ug Val Rayas sa GMC Tennis Club nakasulod sa semifinal round human gipalagpot sila si Mario Amores ug Rene Abrea sa Mactan Island Lawn Tennis Sports Club, Inc. (MILTSCI), 8-4. Miabante sab sa semis sila si Greg Molina ug Obing Galario dihang ilang gipilde sila si Tambis ug Portacion sa Maribago TC.

Sa laing bahin, sila si Raymund Sambas ug Mike Odi sa Timex TC mipasilong sa C plus quarterfinals human sa ilang kulbahinam nga duwa batok nilang Norman Pesodas ug Arnold Amodia, 8-7.

Ang Mayor Arturo Radaza Cup usa sa mga dakung kalihukan sa tinuig nga kapistahan sa Lapu-Lapu City agi’g pasidungog sa ilang mahal nga patron Birhen sa Regla karong Nobiyembre 20-21.

Ang championship games sa ubang mga kategoriya himuon karong Nobiyembre 23. – BANAT NEWS