Sto. Niño Syca milangkat korona sa midget division

Ang Sto. Niño Syca walay kukaluoy nga milubong sa Railsite, 65-47 aron paglangkat sa korona sa midget division sa Barangay Hipodromo Inter-Sitio Basketball League 2008 didto sa Hipodromo Sports Complex, ning siyudad.   Unang nipabuhagay sa naglagiting nga opensa ang Railsite diin nakabentaha kini og tres puntos paghuman sa first quarter sa iskor nga 11-3. Apan ang Sto. Niño Syca  mipakita og milagro ug mao na ang milabaw og 13 puntos paghuman sa first half, 31-18.

Ang Sto. Niño Syca padayon nga namunit og mga puntos hinungdan nga misaka ngadto sa 17 puntos ang ilang bentaha sa third quarter, 51-34.Sa  maong makalumos nga lubong  naglisod na og bangon ang Railsite, samtang naglawig na ngadto sa kadaugan ang Sto. Niño Syca.

Si Edwin Llanos, maoy nangulo sa Sto. Niño Syca sa iyang 20 puntos ug mao sab ang niangkon sa  MVP award. Si Sebastian Nalang miamot og 12 puntos, samtang si Jonel Magno mitampo og otso puntos, samtang ang pilderong Railside gipangulohan ni Jinno Culpa nga mibahog og 21 puntos.

Ang Barangay Hipodromo Inter-Sitio Basketball League 2008 gipasiugdahan sa Sangguniang Kabataan nga gipangulohan ni Hon. Alfie John O. Ocampo uban sa abag sa Barangay Council ubos sa liderato ni Brgy. Capt. Petronilo C. Fat Jr.

Puntos Matag Usa

STO. NIÑO SYCA (65) -- E. Llanos 20, S. Nalang 12, J. Magno 8, A.  Adlawan 7, A. Villamor 6, V. Origences 4, R. Buenavista 4, M.J. Meria 2, M.P. Bastes 1, J.G. Rosaroso 1.

RAILSITE (47) -- J. Culpa 21, J. K. Ocaba 15, K. A Hermoso 4, J. Inoc 2, A. Avanceña 2, C. Amatiaga 2, N. Ybañez 1