Unom ka koponan moduwa sa 6th AUBC

Unom ka teams ang gidapit sa  Asian University Basketball Federation (AUBF) ug sa Basketball Association of the Philippines (BAP) executive board aron mosalmot sa 6th Asian University Basketball Championship nga gikatakda karong Hulyo 5-12 diha sa Cebu Coliseum.

Gitukod sa AUBF, ang tinuig nga torneyo gipaluyohan sab sa Asian University Sports Federation (AUSF) sukad niadtong 1998 ubos sa paningkamot sa International University Sports Federation (IUSF).

Pinaagi sa ilang presidente nga si Tisha Abundo ug executive vice president Robert Calo, ang Federation of School Sports Association of the Philippines (FESSAP),  usa ka sakop sa AUBF  maoy gitahasan sa pagpadagan sa maong internasyonal nga kalihukan sa basketbol.

Ang FESSAP nahimong opisyal nga sakop sa AUBF niadtong Pebrero 29 sa miaging tuig dihang nagkasabot sila ni BAP president Prospero Pichay Jr. ug AUBF president Shin Dong Pa sa South Korea nga gisaksihan nila ni AUBF director Park Hyun Mo ug BAP external lawyer Atty. Romeo L. Magtanong.

Ang mga  partisipanteng koponan ning usa ka semana nga kompetisyon  mao ang Huaqiao University  sa China ug  Hanyang University  sa South Korea,  University of Luzon (UL) sa Pangasinan, Angeles University Foundation (AUF) sa Pampanga ug ang host teams Southwestern University (SWU) Cobras ug University of Visayas (UV) Green Lancers.

Si Felix Tiukinhoy, ang commissioner sa Cebu Sports Athletic Foundation, Inc. (CESAFI) maoy gitudlo nga AUBF commissioner.

Ang commissioner sa Cebu Sports Athletic Foundation, Inc. (CESAFI) nga si Felix Tiukinhoy, Jr. maoy gitudlo nga tournament commissioner  pinasubay sa rekomendasyon  ni BAP regional director Lorenzo ‘Chao’ Sy ngadto ni BAP-SBP president nga si Pichay.

Ang nabantog na kaayong  si Shin Dong Pa ang banggiitang tirador sa South Korean national team sa dekada 60 ug 70 pagasugaton ni Pichay unya sa Hulyo 4.

Si Kongresista  Luis R. Villafuerte, ang  BAP-Samahang Basketbol ng Pilipinas (BAP-SBP) chairman, maoy pinasidunggang dinapit ug mamumulong atol sa opening ceremony.

Ang Sangmu University sa South Korea  mipukan  sa Rizal Technological University sa miaging tuig  nga  AUBC finals didto sa Daet, Camarines Norte.

Matud pa ni Pichay nga kun ang local team maoy makampiyon  sa 2008 AUBC, iya kining paduwaon sa National Open Championship didto sa Bacolod City sa tunga-tungang bahin sa bulan sa Septiyembre  ug sa National Inter-Club Championship sa Baguio City.