NLEX kinumpleto sweep sa Phoenix

Swak sa best-of-five semifinal round

MANILA, Philippines — Hindi na nagpaawat ang mga Road Warriors sa pagdiretso sa kanilang ikat­long semifinals appea­rance.

Nirapido ng NLEX ang Phoenix, 137-89, sa Game Three para walisin ang ka­nilang quarterfinals series sa PBA Season 50 Go­ver­­nors’ Cup kaha­pon sa Ni­noy Aquino Sta­dium sa Ma­late, Manila.

Pumukol si Robert Bo­lick ng 23 points tampok ang tatlong three-point shots at tatlong four-poin­ters para sa tropa ni coach Jimmy Alapag.

“I’m grateful to have the opportunity to coach them and I’m extremely proud that not only that we’re in the semifinals but now they get a chance to do something great,” ani Alapag.

Isinara ng Road Warriors sa 3-0 ang kanilang best-of-five showdown ng Fuel Masters na tinalo nila sa Games One, 97-92, at Two, 124-117.

Lalabanan ng NLEX sa semifinals series ang mananalo sa quarterfinal duel ng Rain or Shine at Con­verge.

Tabla sa 1-1 ang serye ng Elasto Painters at Fiber­Xers.

Huling sumampa sa se­mis ang Road Warriors sa 2021 PBA Governors’ Cup sa ilalim ni coach Yeng Guiao.

Maagang nakalayo ang NLEX sa first period tangay ang 36-18 abante patungo sa 43-21 kalamangan sa pagtatapos nito.

Kaagad kumana si Bo­lick ng 16 points sa nasabing yugto.

Ang magkasunod na four-point shots nina Kevin Alas at Bolick ang nagbaon sa Phoenix sa 62-28 sa 6:38 minuto ng second quarter.

Itiniklop ng Road Warriors ang first half bitbit ang 35-point lead, 78-43, kontra sa Fuel Masters.

Mula rito ay hindi na na­kalapit ang Phoenix.