3-2 Target sa Pistons

Makuha kaha sa defending champion ang tulo ka sunod-sunod nga daog sa ilang paghost batok sa San Antonio Spurs karon sa Game-5 sa ilang best-of-seven NBA finals didto sa The Palace of Auburn Hills sa Michigan.

Nakapabor ang Pistons ning tungura human nila maangkon ang duha ka sunod-sunod nga daog sa Game-3 ug Game-4 tungod kay sila man gihapon ang mo-host sa karon sa Game-5 gumikan sa gipatuman nga 2-3-2 format sa finals.

Tungod niini, kompiyansa ang Pistons nga ilang makuha ang ikatulong daog tungod kay sama sa unang duha ka paghost nila sa serye, nakatabang kaayo ug dako ang mga abiba sa ilang mga fans gawas sa homecourt advantage.

Kung matuman sa Pistons ang ilang tahas, usa na lang unya ka daog ang ilang gikinahanglan aron hingpit na gyud nilang masakmit ang prestihiyosong korona.

Apan kung mapakyas ang Pistons sa ilang tinguha nga 3-2 nga bentaha sa serye, lisod na gyud kaayo nilang madepensahan ang ilang korona tungod kay siguradong lat-an gyud sila sa San Antonio Spurs sa Game-6 didto sa SBC Center sa San Antonio, Texas nga maoy mohatud kanila sa paglangkat sa titulo.

Si Detroit coach Larry Brown siguradong mopatuman gihapon sa gigamit niyang physical game batok sa Spurs gawas sa hugot kaayong depensa nga iyang ipahamtang nila ni Tim Duncan ug Manu Ginobili.

Timailhan niini, wala kaayo makahimo ug maayong set play si Duncan tungod sa grabing depensa nga gipakita ni Ben Wallace sa Pistons hinungdan nga igo lang kining mirehistro ug 16 sa Game-4.

Ang Spurs magsandig gihapon nilang Tony Parker, Bruce Bowen, Robert Horry ug Nazr Mohhamed sa pagsumpo nilang Richard Hamilton, Chauncey Billups ug Tayshaun Prince sa Pistons.