Mr. Wash-FEU pinatalsik ng MLQU-Boysen

Pinatalsik ng Boysen-MLQU ang Mr. Wash-FEU sa kontensiyon patungo sa crossover semifinals matapos na itakas ang 57-51 tagumpay kahapon sa 1st edition ng Philippine Youth Basketball League sa Makati Coliseum.

Humakot si Edelito Saygo ng 20 puntos, habang nagdagdag naman si Ceazar Rivera ng 14 puntos nang pigilan ng Paint Experts ang Laundry Experts sa final 2:13 minuto ng labanan upang itiklop ang kanilang five-game sweep sa quarterfinal round sa winners bracket.

Bunga ng panalong ito, kailangan na lamang ng wild card entry mula sa consolation bracket na manalo upang makumpleto ang cast ng semis.

At sa ngayon, tanging ang may 4-0 win-loss slate na Spring Cooking Oil at Dazz-Letran ang nasa kontensiyon sa wild card entry kung saan kailangan ng Dazz-Letran na talunin ang Spring Cooking Oil ng hindi bababa sa pitong puntos sa Linggo.

Nauna rito, nakapasok na rin sa semis ang Skyland Estate matapos ang 74-71 tagumpay kontra sa Mercury Freight-College of St. Benilde.