Boysen-MLQU nasa semis na

Nagpakatatag sa huling maiinit na bahagi ng overtime ang Boysen-MLQU upang daigin ang Maynila, 69-66 at maokupahan ang unang semifinals slot sa 1st Philippine Youth Basketball League sa Makati Coliseum kahapon.

Humakot si Edelito Saygo ng 20 puntos, kabilang ang anim sa overtime period upang iposte ng Paint Experts ang kanilang ikaapat na sunod na panalo at sibakin ang Maynila sa kontensiyon bunga ng kanilang 1-3 win-loss slate.

Nagsalpak si Jay-Arr Estrada ng jumper at split upang itabla ang iskor sa 53-all, habang isang layup ni Marvin Castañeda ang naghatid sa Maynila sa 55-53 kalamangan, patungong 1:04 ang nalalabi sa regulation.

Naglunsad sina Saygo, Jun Lana at Rodel Mallari ng 11-3 bomba sa extra period upang maagaw ng Paint Experts ang kalamangan sa 66-58, 36 segundo na lamang ang nalalabi.

Sa iba pang laro, naitakas rin ng Mr. Wash-FEU ang 72-61 panalo kontra sa Crystal Spring-Las Piñas.