77-anyos lola natagpuang patay sa septic tank

MANILA, Philippines — Isang 77-anyos na lola na ilang araw nang nawawala ang natagpuang patay sa loob ng ginagawang septic tank sa isang subdivision sa Barangay Tungkil, Minglanilla, Cebu, nitong Huwebes ng umaga.

Ayon kay Minglanilla Police Chief Lt. Col. Maria Theresa Macatangay, nitong Agosto 3 nang maiulat sa mga awtoridad na nawawala ang biktima na hindi pa tinukoy ang pagkakakilanlan.

Sinasabing ang matanda ay may sakit na Alzheimer at ang naturang septic tank ay malapit lang sa bahay nito.

“May nakarinig nang malakas na ingay pero pagtingin nila sa bintana, wala namang tao,” sabi ni Mactangay.

Sinasabing baka lumabas ng bahay ang biktima at saka biglang nahulog sa ginagawang septic tank na natakpan lamang ng mga GI sheets.

Sa lalim umano ng septic tank ay maaaring hindi na nakahingi ng tulong ang biktima hanggang sa doon na nalagutan ng hininga.