15-anyos nag-post og armas, natultolan sa mga polis

CEBU, Philippines — Kinse anyos nga estudyanteng nag-post og video nga naghupot og armas natultolan sa kapolisan, armas ug mga bala nasakmit.

Ang maong estudyante gikatahong nag-post sa iyang kaugalingon nga naghupot og armas ug mga bala nga iyang gi-share sa ilang private class group chat sumala pang Police Lieutenant Colonel Dindo Juanito B. Alaras, hepe sa Liloan Municipal Police Station. Ang menor de edad gipaubos sa rehabilitation ug reintegration program subay sa Republic Act No. 9344 o Juvenile Justice and Welfare Act of 2006.

Ang kaso gihuptan sa Women and Children Protection Desk (WCPD) sa Liloan Municipal Police Station. Base sa imbestigasyon, ang prinsipal sa Liloan National High School mi-report sa insidente ngadto sa kapolisan alas 1 sa hapon niadtong Agosto 3 human nikatap ang maong video sa private class group chat. Inabagan sa WCPD ug Municipal Social Welfare and Development Office (MSWDO) ilang ilaha kining nakaestorya apil ang iyang guardian sulod sa eskwelahan.

Ang bata niangkon bahin sa armas ug gitultolan ang mga polis kung asa na ang armas. Usa ni ka snub-nosed revolver nga adunay lima ka ug pecha kurno nga adunay improvised nga kutsilyo.

Ang pangangkon niya, pangdepensa daw niya ni sa kaugalingon kay naay kasige og pang-bully sa iyaha.

Gisusi na sa Firearms and Explosives Office (FEO) kung kinsa ang tagiya niini o kung usa lang ba kini sa daghang mga dili lisensyadong armas nga naa karon sa mga kamot sa mga sibilyan. Gisusi usab sa kapolisan ang posibleng criminal liability sa bata ubos sa Comprehensive Firearms and Ammunition Regulation Act, Presidential Decree No. 9 ug uban pang may kalabutan nga mga balaod.

Matud pa ni Alaras, gipakusgan sa Liloan Municipal Police Station ang police visibility sa mga eskwelahan pinaagi sa campus visits, koordinasyon sa mga school officials ug information drives aron mapalig-on ang kaluwasan sa mga estudyante ug malikayan ang susamang mga insidente samtang nagpadayon ang imbestigasyon. IBM BANAT NEWS