EDITORYAL — Gilaay na sa trabaho
Ang trabaho importante kaayo para sa tanan, ilabi na sa mga naay mga pamilyang gasalig sa ilang inadlaw-adlaw nga kinitaan. Pero bisan sa mga wala pa nangaminyo importante gihapon ni para isuporta sa ilang mga panginahanglan.
Pero dili tanang trabaho haom sa kung unsa gyuy gusto sa mga trabahador, gani daghang mga gradwado og mga kurso nga ang trabaho karon layo ra o dili takdo sa ilang nahuman sa kolehiyo.
Tungod ni sa kakulangon sa oportunidad nga makatrabaho sa ilang gieskuylahang kurso, ang uban manarbaho nalang og bisan unsa basta naay binulang madawat nga sweldo.
Pero nigawas karon sa usa ka survey sa Agile Data Solutions Inc. ning tuiga lang gihimo, walo sa kada napulo ka Pilipinong trabahador ang gustong mobiya ug mangita og laing trabaho kay gipanglaay na. Dili lang tungod sa sweldo ang rason sa ilang paghawa, kondili, ang personal nilang rason, kay wala na silay oras sa ilang kaugalingon, kulang na sila sa pahulay, sa ilang pamilya, dili na nila mabuhat ang naandan nilang ginbuhaton sama sa ilang mga hilig o hobbies.
Ikaduha nalang na ang sweldo, mga benepisyo, management sa ilang kompanya ug ang ilang direktang mga superbisor sa trabahoan,
Ang uban sab, nakabantay nga murag wala molambo ilang karera sa kasamtangan nilang gitrabahoan, natural gyud ni ilabi na sa mga dili haom o wala natakdo sa ilang gieskuylahan ang ilang trabaho.
Kani tanan nakapuno lang sa gibating kalaay sa trabahante sa ilang trabaho. Sagad ni nabantayan sa unang kwarter o unang tulo ka bulan sa trabahador sa ilang trabahoan.
Naa say uban, mangundang og panarbaho para magnegosyo kay sila ray amo ug walay makabuot sa ilang oras. Mahatagan nila og panahon ang kaugalingon ug ilang pamilya, bisan og gamay ra ilang sweldo.
Pero para sa mga pamilyado, ug lisod makakita dayun og laing trabaho, antuson nalang kung unsay naa nila karon nungka sa magutom. Samot na adtong mga nag-abang og pinuy-anan ug dunay daghang mga utang.
Ang resulta, daghan ang naa nay mga chronic diseases o mga sakit nga sa hilom nagkaanam og kagrabe sa sulod sa lawas nga wala panumbalinga tungod sa trabaho.
- Latest
