EDITORYAL - Human sa waste segregation, unsa may sunod?

Mipatuman na og estriktong implimentasyon sa waste segregation ang mga LGUs sa Metro Cebu tungod aning krisis sa basura nga nasinati human sa pagsirado sa Binaliw landfill epekto sa pagdahili sa basura niini nga nipatay sa ilang mga trabahante niadtong Enero 8,2026.

Karon gikinahanglan nang mosunod ang mga tawo nga bahigon ilang mga basura nga malata ug dili malata; mga industrial ug hospital wastes ug uban pa.

Mas maayo sab tingali nga mas daghanon ang mga adlaw sa pagkolekta sa mga basurang malata kun itandi sa mga dili malata. Tungod kay mobaho ug makaapektar na unya sa panglawas sa mga tawo.

Kung naa gyuy magbantay nga mga barangay environmental officers sa mga garbage collectors nga molibot sa mga barangay, sigurado gyung motuman ug maanad na gyud ang mga tawo sa sistema nga kinahanglang mag segregate gyud sa ilang basura kada adlaw.

Dali ra na kaayo matanom sa alimpatakan sa mga tawo, usa ngadto sa duha ka semana makatimaan na ang tanan sa schedule kun unsa nga klaseng basura ang kolektahon anang adlawa.

Ang kinahanglan lamang dili wagtangon ang mga magbalantay nga BEOs, unya estriktohon gyud ang implimentasyon.

Apan mas maayo nga dili lang kutob diha sa tinubdan sa basura ang aksyonan sa mga LGUs, kondili ang padulngan o dad-an sa mga basura.

Ilaha usab untang kuhaan og pagtulon-an ang nahitabo sa Binaliw aron dili na kini mausab pa.

Apan dili lang  kutob sa pagdahili ug kamatayon sa mga tawo, negatibong epekto sa kalikopan ug kontaminasyon sa mga lugar sa buhatong landfills o staging areas.

Kinahanglang apil sa ilang nakat-onan ang managana sa mga implikasyon ug epekto matag dunay trahedyang mahitabo sama sa Binaliw.