Higala ko si Santo Niño

Tuguti ko nga isugid ko kaninyo ang akong nasinati nga milagro ni Señor Santo Niño nga kon wa pa siya, patay na gyud ko. Nahitabo ang milagro 31 ka tuig na ang nakalabay.

Hilabihan kangilo nga hunahunaon kon maligsan ka og bug-at kaayong sakyanan, nga nagguyod og trailer. Bisan sa kadugay na sa maong hitabo, apan nagpabilin kining lab-as sa akong panumdoman.

Ang hugot ko nga pagtuo kang Santo Niño, maoy rason nga iya ko nga gimilagrohan ug gihimong gaan ang trak nga miligis kanako.                    

Uwan-uwan kadto, mga alas 10:15 sa buntag, diha nga naligsan ko sa prime mover didto sa national highway sa Sitio Bakhaw, Barangay Catmon-daan, Catmon kaniadtong Hunyo 25, 1995.

Kada Martes man gud kaniadto, atol sa akong day-off, magprograma ko sa usa ka estasyon sa radyo didto sa Bogo, lungsod pa niadtong higayona. Ini'g ka ugma, mobalik ko dinhi sa siyudad sakay sa akong motorsiklo. Miyerkules kadto sa buntag atol sa pagkahitabo.

Tungod sa kadanglog sa karsada kay nag-uwan niadtong higayona, nagbabag-babag ang trailer nga akong ikasugat kay ang danghag nga driver ug helper, wa mokonektar sa brake sa trailer ngadto sa prime mover.

Mao nga inig-brake sa driver, momenor ang dagan sa prime mover, apan iduot kini sa trailer kay dili man mo-brake ang iyang ligid.

Tungod niini, magbabag-babag ang dagan sa trailer, ug ako nga nagsakay og motorsiklo nga gikasugat sa prime mover, gidasmagan ug naligsan.

Pwerte nakong singgit “Santo Niño tabangi ko!” diha nga nagpaingon na kanako ang truck, apan naligsan gyud ko sa tuo nako nga paa.

Ang bag-o pa nako nga karsones nga gisul-ob niadtong higayona, nagisi ang dapit sa paa ug naporma ang gisi og “L.”

Hangtud karon, gitipigan pa nako ang karsones nga gisul-ob ko atol sa akong pagka-aksidente ug maoy buhing handumanan sa milagro kanako ni Santo Niño.

Wa mabali ang akong bukog sa paa bisan og gilatayan kini sa ligid. Gamay’ng pangos ra ang akong nahiagoman, apan nabungkag ang akong motor nga napasok ilawom sa prime mover.

Kaniadtong 1981, gihatagan ko og imahen ni Santo Niño, ug sulod sa 14 ka tuig, ako kining hagkan inigdayon nakong lakaw, ug hagkan pag-usab inigkagabii.

Human ko giluwas ni Santo Niño, misamot ang akong pagyukbo kaniya ug miila sa iyang pagka gamhanan. Niadtong 2014, may mihatag na usab kanako og bronze image sa Santo Niño, ug kanunay ko na kini nga gidaladala panahon nga molakaw ko.

Siya maoy akong magbalantay. Panahon sa akong kalisdanan, kanunay ko niya nga gitabangan. Kamo, himoa usab nga inyong higala si Santo Niño. Viva Pit Senyor!