Bakak sa Palasyo
Kon duna pay nahibiling uwaw ang Malakanyang, angayng bakwion ang ilang pagdupa sa bag-ong pork barrel nga gihatagan nila og lisod kaayo nga ngalan, MAIFIP (Medical Assistance for Indigents and Financially Incapacitated Patients):
Dakong bakak ang ilang sulti nga ang MAIFIP gipatuman sa Department of Health (DOH) ug direktang napahimuslan sa mga pasyente nga walay bisan gamayng labot ang mga politiko.
Hinaut duna silay kaisog sa pagpasabot sa mga tagtungod sa himatyon nga pasyente nga gipasagdan lang sa ospital kay wala dayon makapa-pirma og guarantee letter sa ilang kongresista.
* * *
Ambot nganong walay nakahunghong sa palasyo nga nagbaha ang mga ebidensiya sa dili lang pagpanghilabot kon dili sa pagkontrolar gyod sa mga politiko sa MAIFIP.
Dili ilang mga kaatbang kon dili ang mga senador ug mga kongresista mismo ang ni-post sa pirmado nilang guarantee letters aron pagpasigarbo sa ilang kamatinabangon.
Ambot pareha ba og printahanan, o uniporme bang hulmahan, o managsama ang ilang pangutok: Kinadak-an nga bahin sa guarantee letters dili ang pagpasabot sa kaso sa pasyente ngadto sa destinasyong ospital kon dili ang nawong ug ngalan sa mga politiko.
* * *
Wala sa lagda sa MAIFIP ang panginahanglan sa suwat sa mga politiko. Pero walay ospital nga motagad sa pasyente kon walay guarantee letter.
Kay bisan wala sa lagda kabahin sa mga dokumento nga ilang ipakita sa pagpaningil na og reimbursement gikan sa Department of Health (DOH).
Ambot giluod ba sab sa pamolitika, o tungod lang sa kalangayan sa burukrasya, binilyon na ka pesos ang claims sa mga ospital sa MAIFIP nga wala pa kabayri.
* * *
Wala sab sa lagda sa AKAP (Ayuda Para sa Kapos ang Kita Program) sa Department of Social Welfare and Development (DSWD) nga apil ang mga kongresista ug mga senador.
Gani, duna gyoy lagda ang DSWD nga nagdili sa mga politiko sa pagtambong ug pagbutang sa ilang tarps atol sa pag-apud-apod.
Pero nganong silay hawod kinsay hatagan ug pilay ihatag? Kay silay tag-iya sa P26 bilyones nga AKAP karong tuiga, tag-P200 milyones kada senador ug tag-P100 milyones kada kongresista.
Walay opisyal sa DSWD nga mosuway og bugaw sa mga politiko kay maoy nagbuot sa ilang budget ug kon duna pa ba silay trabaho.
* * *
- Latest
