EDITORYAL — Kakulangon masolusyonan na unta

Karong buwana sa Hunyo mobalik na og abli ang klase sa mga tunghaan, pribado man o publiko. Samtang ang uban, karon pang Agosto ilabi na sa mga private schools. Siguradong mapun-an na sab ang populasyon sa mga eskuylahan karong tuiga.

Sa nakalabay nga school year, dunay daghang mga kakulangon sa halos tanang aspeto sa edukasyon sa nasud, ilabi na sa gidaghanon sa mga school buildings, mga magtutudlo, non-teaching staff, nagkulang sab sa mga galamiton, laboratoryo, makinarya ug ekipo para sa mga senior high school aron paghimo kanilang ‘job ready.’

Karong pagbukas sa klase, daghang mga nag-move up para sa ilang senior high school. Sa ubang mga tinun-an, ini og human sa ilang duha ka tuig sa senior high manrabaho na tungod kay walay kwartang pang kolehiyo.

Swerte nalang sa ubang mga tinun-ang gikan sa pinakakabus nga pamilya ang makapadayun sa pagtungha kung adunay public college sa ilang lugar o duol sa ilang lugar. Apan sa uban, ang nakat-onan nila sa senior high school mao na ang ilang himan para sa ilang panarbaho.

Masolusyonan na unta kini karong tuiga ang mga kakulangon, ilabi na ang mga magtutudlo nga duna gyuy kahibalo sa ilang ipangtudlo sa senior high. Unya kadtong mga galamiton sa pagtudlo nga wala kaniadto, naa na unta niini karon.

Tungod kay nagusik-usik lang unya sa panahon ang mga bata ug ang ilang mga ginikanan pagpa-enroll sa senior high school kay wala gihapon silay nakat-onan nga magamit aron makatrabaho.

Kun ang senior high school graduates dunay nakat-onang “job-ready” skills, bisan kadtong pinaka-kabus nga estudyante mahatagan og kahigayonang makapadayun sa kolehiyo kay makatrabaho man sila dayun gamit ang nakat-unan sa senior high.